Шимолий Корея Сариқ денгиз томон қанотли ракеталарини учирди

КХДР Сариқ денгиз йўналиши бўйича бир нечта қанотли ракеталарини учирди. Бу ҳақда Жанубий Корея штаб бошлиқлари бирлашган қўмитасига таяниб, “Yonhap” хабар берди. 

Учириш бугун, 24 январь куни маҳаллий вақт билан соат 7:00 ларда амалга оширилган. Агентлик ракеталар сони ва уларнинг турига аниқлик киритмаган.

“Кузатув ва ҳушёрликни кучайтирган ҳолда, ҳарбийларимиз Шимолий Корея провокацияларининг қўшимча белгиларини кузатиш учун Қўшма Штатлар билан яқиндан ҳамкорлик қилмоқда”, дейилади Жанубий Корея ҳарбийлари баёнотида.

Агентлик манбаларининг аниқлик киритишича, ракеталар баллистик ракеталарга қараганда пастроқ баландликда учган. Таъкидланишича, “парвоз масофаси қисқа бўлмаган” ва ракеталар ердан учирилган. “Yonhap” булар Hwasan-31 ядро каллагини олиб юришга қодир Hwasal-1 ёки Hwasal-2 қанотли ракеталари бўлиши мумкинлигини тахмин қилмоқда.

Эслатиб ўтамиз, 5 январь куни машғулотлар доирасида Шимолий Корея қирғоқ артиллерияси Жанубий Кореянинг Сариқ денгизда жойлашган Ёнпхёндо ва Пэннёндо ороллари томон 200 га яқин снаряд отганди.  Бунга жавобан Жанубий Корея ҳарбийлари ўз манёврларини ўтказиб, 400 та снаряд отди. 6 январь куни эса Пхеньян ғарбий қирғоқдан Сариқ денгиз томон яна 60 га яқин снаряд отди.