Шавкат Мирзиёев Россия делегациясини қабул қилди

Бугун, 15 апрель куни Ўзбекистон Республикаси Президенти Шавкат Мирзиёев Россия Федерацияси Президенти Администрацияси раҳбарининг биринчи ўринбосари Сергей Кириенко бошчилигидаги делегацияни қабул қилди. Бу ҳақда Ўзбекистон етакчисининг матбуот хизмати хабар берди. 

Қайд этилишича, учрашув аввалида юқори мартабали меҳмон Ўзбекистон раҳбарига Россия Федерацияси Президенти Владимир Путиннинг саломи ва энг эзгу тилакларини етказган. Ўзбекистон билан Россия ўртасидаги стратегик шериклик ва иттифоқчилик муносабатларини чуқурлаштириш доирасида олий даражада эришилган келишувларни амалга ошириш масалалари кўриб чиқилган.

Барча йўналишларда фаол мулоқотлар олиб борилаётгани мамнуният билан қайд этилган. Товар айирбошлаш ҳажми барқарор ўсиб бормоқда, саноат кооперацияси бўйича муҳим лойиҳалар амалга оширилиб, маданий-гуманитар алмашинув кенгаймоқда.

“Мамлакатимизда биринчи интеграциялашган атом электр станциясини қуриш лойиҳасини амалга оширишга, шунингдек, тинч атом соҳасидаги ҳамкорликка алоҳида эътибор қаратилди”, дейилади хабарда.

Рақамли технологиялар, ёшлар ва ахборот сиёсати, оммавий ахборот воситалари ҳамда фуқароларнинг ташаббусларини ривожлантириш борасидаги ўзаро ҳамкорликни фаоллаштириш юзасидан келишувларга эришилган.

Эслатиб ўтамиз, Ўзбекистон Республикаси Президенти Администрацияси раҳбари Саида Мирзиёева 2025 йилнинг май ойида Россияда бўлиб, Ҳукумат раиси Михаил Мишустин, Федерал Мажлис Федерация Кенгаши раиси Валентина Матвиенко, жумладан Президент Администрацияси раҳбарининг биринчи ўринбосари Сергей Кириенко билан учрашиб қайтганди.