Shavkat Mirziyoyev qator davlat rahbarlari bilan suhbatlashdi

Kecha, 20 avgust kuni O‘zbekiston Respublikasi Prezidenti Shavkat Mirziyoyev Budapesht shahrida o‘tayotgan yengil atletika bo‘yicha jahon chempionati doirasida bir nechta davlat rahbarlari bilan suhbatlashdi. Bu haqda Prezident Matbuot xizmati xabar berdi.

Aytilishicha, Shavkat Mirziyoyev mazkur tadbir doirasida Qatar Davlati Amiri Tamim bin Hamad Ol Soniy, Ozarbayjon Respublikasi Prezidenti Ilhom Aliyev, Qirg‘iz Respublikasi Prezidenti Sadir Japarov, Turkmaniston Prezidenti Serdar Berdimuhamedov, Serbiya Respublikasi Prezidenti Aleksandr Vuchich va Tatariston Raisi Rustam Minnixanov bilan gaplashgan. Suhbatlarda ikki tomonlama amaliy hamkorlikning dolzarb masalalari yuzasidan fikr almashilgan.

Shuningdek, yetakchilar jahon chempionatining erkaklar o‘rtasida 100 metr masofaga yugurish bo‘yicha final bahsini tomosha qilgan.

Ma’lumot uchun, yengil atletika bo‘yicha XIX jahon chempionati Budapesht shahrining Yengil atletika milliy markazida 2023 yil 19 avgust kuni boshlangan bo‘lib, 27 avgustgacha davom etadi. Medallar sportning 49 turi bo‘yicha, shu jumladan erkaklar va ayollar o‘rtasida 24 tadan yo‘nalishda hamda aralash estafetada o‘ynalmoqda. Musobaqalarda 190 dan ziyod mamlakatdan 2 ming nafardan ortiq sportchi qatnashmoqda. Chempionatda O‘zbekistondan 5 nafar atlet sportning balandlikka sakrash, uch xatlab sakrash, uzunlikka sakrash, yettikurash va marafon kabi turlarida kuch sinashmoqda. G‘oliblar hamda olimpiya normativlarini bajargan sportchilar 2024 yilda Parij shahrida bo‘lib o‘tadigan Olimpiya o‘yinlarida ishtirok etish huquqini qo‘lga kiritadi.

O‘zbekiston Prezidenti Shavkat Mirziyoyev Vengriyaga amaliy tashrifi tadbirlari yakunlangach, Toshkentga jo‘nab ketgan.

Eslatib o‘tamiz, Shavkat Mirziyoyev 19 avgust kuni Vengriyaga jo‘nab ketgan edi. U tashrif doirasida Vengriya Bosh vaziri Viktor Orban va Turkiya Respublikasi Prezidenti Rajab Toyib Erdo‘g‘an bilan uchrashuvlar o‘tkazdi hamda OTP banki boshqaruvi raisi Shandor Chanini qabul qilgandi.