Шавкат Мирзиёев Ҳалима Яқубни Ўзбекистонга таклиф этди
Жамият
−
17 Январь 2023 9080
Бугун, 17 январь куни Ўзбекистон Республикаси Президенти Шавкат Мирзиёевнинг Сингапурга давлат ташрифи доирасида ушбу мамлакат Президенти Ҳалима Яқуб билан икки томонлама учрашув ўтказилди. Бу ҳақда Ўзбекистон Республикаси Президенти Матбуот хизмати хабар берди.
Учрашувда Ўзбекистон ва Сингапур ўртасидаги муносабатларни янада чуқурлаштириш истиқболлари, ижтимоий-сиёсий ҳаётни демократлаштириш борасидаги ислоҳотлар юзасидан фикр алмашилди.
Таълим соҳасида фаол ҳамкорлик қилинаётгани қайд этилди. Тошкентда Сингапур менеджментни ривожлантириш институти ҳамда Сингапур технологиялар, менеджмент ва коммуникациялар академияси муваффақиятли фаолият юритмоқда.
Икки мамлакатнинг Марказий ва Жануби-Шарқий Осиёда минтақавий ҳамкорлик ва интеграцияни кенгайтириш борасидаги тажрибаси батафсил кўриб чиқилди.
Ўзбекистон ва Сингапур халқаро майдонларда минтақавий барқарорлик ва изчил тараққиёт масалаларида бир-бирини англаши ва бу борадаги ташаббусларни илгари суришда ўзаро кўмаклашаётгани қайд этилди.
Учрашув якунида ҳамкорликнинг асосий йўналишлари белгилаб олинди.
Шавкат Мирзиёев Ҳалима Яқубни ўзига қулай бўлган вақтда мамлакатимизга ташриф билан келишга таклиф этди.
Live
Барчаси