Шакиранинг ЖЧ очилишида кийган кийими аукционга қўйилади

2026 йилги Жаҳон чемпионати билан боғлиқ қатор ноёб эсдалик буюмлари, жумладан, хонанда Шакира саҳнада кийган либос ҳам турнир якунланганидан сўнг, Christie’s аукцион уйида хайрия мақсадида сотувга қўйилади. Бу ҳақда ташкилот расмий сайти хабар берди.

Маълум қилинишича, Christie’s ва Global Citizen ташкилотлари FIFA’нинг Global Citizen Education Fund жамғармаси фойдасига махсус онлайн-аукцион ташкил этади.

“Аукционга Жаҳон чемпионатининг дастлабки 3 та очилиш учрашувида ишлатилган расмий тўплар, шунингдек, Шакира, BTS ва Мадонна иштирокидаги илк Global Citizen ярим вақт шоусида саҳнада фойдаланилган эксклюзив буюмлар қўйилади”, дейилади хабарда.

Аукцион жорий йилнинг 22 июлидан 29 июлигача Christie’s расмий сайти орқали ўтказилади.
Тушган маблағлар тўлиқ FIFA’нинг Global Education Fund жамғармаси ҳамда қашшоқликка қарши курашувчи Global Citizen нодавлат ташкилотига йўналтирилади. Ушбу маблағлар дунёнинг 200 мамлакатидаги болалар учун таълим ва футбол билан шуғулланиш имкониятларини кенгайтиришга сарфланади.

“The Athletic” нашрининг маълумотига кўра, аукцион лотлари орасида Лионель Месси, Рауль Хименес ва АҚШ терма жамоаси футболчилари имзо чеккан футболкалар, Жаҳон чемпионати финалининг расмий тўпи, очилиш ўйинларида ишлатилган тўплар ҳамда турнирнинг расмий қўшиғи – “Dai Dai” клипида Шакира кийган саҳна либоси ҳам бўлади.

2026 йилги Жаҳон чемпионатининг финали 19 июль куни Нью-Жерси штатидаги “МетЛайф” стадионида бўлиб ўтади. Унда Испания ҳамда Аргентина терма жамоалари ўзаро баҳс олиб боради.

Учинчи ўрин учун баҳс эса 18 июль куни Майами шаҳрида Франция ва Англия терма жамоалари ўртасида ўтказилади.