Шаҳрам мард бўлса рингга чиқиб, мени мағлуб этсин – Шоҳжаҳон Эргашев

Бир неча йилдан буён кўплаб шов-шувларга сабаб бўлиб келаётган ўзбекистонлик профессионал боксчилар — Шоҳжаҳон Эргашев ва Шаҳрам Ғиёсовнинг ўзаро жанг ўтказиши мумкинлиги ҳақидаги гап-сўзлар тўхтамаяпти. Яқин вақтгача иккала спортчи ҳам ижтимоий тармоқлар орқали бир-бирига қаратилган видеоларни жойлаб келди.

Бир неча кун олдин Шоҳжаҳон Эргашев QALAMPIR.UZ'га интервью бериб, Ғиёсовни керак бўлса Бухорога бориб, маҳалласида “дўппослаб” келишга тайёрлигини маълум қилди.

“Ғиёсов мард бўлса рингга чиқиб, мени мағлуб этсин. Ким шер, ким лайча итлиги шунда маълум бўлади. Шаҳрам ўзингга ишонсанг, жангга чиқ! Истасанг, Бухорога бориб уришаман. Шаҳрам маҳалласига ринг қурса, ўша жойга бориб қўшниларини олдида жанг қиламан. Баҳсни қаерда ўтказилишини менга аҳамияти йўқ. Уни қанақа қилиб мағлуб этишни яхши биламан. Шаҳрам ақли етса, мен билан жанг қилсин” дейди Эргашев.

Маълумот учун, Шоҳжаҳон Эргашев 2015 йилдан буён профессионал боксда фаолият олиб боради. У профбоксда умумий 23 та жанг ўтказиб, баҳсларнинг барчасида ғалаба қозонган. Шаҳрам Ғиёсов эса 2018 йил профбоксда дебют қилган. У умумий 13 та жангда рингга кўтарилиб, барча тўқнашувда рақибларини мағлуб этган.