Сериал давом этади. Мбаппенинг “Реал” билан келишгани рад этилди
Спорт
−
08 Январь 4370
ПСЖ ҳужумчиси Килиан Мбаппенинг атрофидагилари футболчининг “Реал”га ўтиши ҳақидаги хабарларни рад этди.
“Килианнинг келгуси фаолияти борасида ҳеч қандай келишув йўқ. Ҳозирча музокаралар бошланмаган. Мбаппе муҳокама қилиш ва қарор қабул қилиш учун зарур бўлган вақтга ҳеч нарса таъсир қила олмайди”, дейди Мбаппенинг яқинларидан бири.
Жорий мавсумда 25 ёшли Мбаппе барча мусобақаларда 24 та учрашувда қатнашиб, 25 та гол урди ва 3 та голли узатмани амалга оширди. ПСЖ Франция Лига 1 турнир жадвалида 1-ўринда, Луис Энрике шогирдлари 17 ўйинда 40 очко жамғарган. Ички чемпионатнинг навбатдаги ўйинида парижликлар меҳмонда “Ланс” билан ўйнайди.
Эслатиб ўтамиз, аввалроқ “Реал” Килиан билан тўлиқ келишувга эришгани ҳақида хабар берилган эди. Ҳужумчи 2018 йилдан буён ПСЖда ўйнаб келмоқда. Франциялик форварднинг клуб билан шартномаси 2024 йилгача мўлжалланган.
