Сенатнинг 2022 йилдаги сўнгги ялпи мажлиси бошланди

Бугун, 27 декабрь куни Ўзбекистон Республикаси Олий Мажлиси Сенатининг ўттиз олтинчи ялпи мажлиси ўз ишини бошлади.  

Ялпи мажлис видеоконференцалоқа тарзида жорий йилнинг 27-28 декабрь кунлари ўтказилиши режалаштирилган.

Ялпи мажлисда: 

•    “2023 йил учун Ўзбекистон Республикасининг Давлат бюджети тўғрисида”ги, “2022 йил учун Ўзбекистон Республикасининг Давлат бюджети тўғрисида”ги Ўзбекистон Республикаси Қонунига ўзгартишлар киритиш ҳақида”ги;

•    “Ҳуқуқбузарликлар профилактикаси тўғрисида”ги;

•    “Мувофиқликни баҳолаш органларини аккредитация қилиш тўғрисида”ги;

•    “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги қонунлар муҳокама қилинади. 

Шу билан бирга навбатдаги ялпи мажлисда “Техник жиҳатдан тартибга солиш тўғрисида”ги ва “Ўзбекистон Республикаси Ҳукумати билан Туркия Республикаси Ҳукумати ўртасида маҳкумларни топшириш тўғрисидаги битимни (Тошкент, 2022 йил 29 март) ратификация қилиш ҳақида”ги ҳамда “Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида”ги қонунларни ҳам кўриб чиқиш режалаштирилган.

Бундан ташқари, сенаторлар томонидан маҳаллалар инфратузилмасини янада яхшилаш бўйича белгиланган лойиҳалар юзасидан амалга оширилган ишлар ҳамда 2030 йилга қадар Ўзбекистон Республикасида гендер тенгликка эришиш стратегиясининг 2022 йилдаги ижроси ҳамда уни амалга ошириш бўйича 2023 йилга мўлжалланган чора-тадбирларни тасдиқлаш масаласи ҳам муҳокама қилинади.

Ялпи мажлис доирасида Олий Мажлис Сенати Кенгашининг қарорларини тасдиқлаш ҳам назарда тутилган.