Сайёҳлар оммавий равишда Францияга боришдан бош тортмоқда

Сайёҳлар Францияда юз бераётган тартибсизликлар туфайли мамлакатга учишдан бош тортмоқда. Бу ҳақда “France 24” хабар берди.

Париж сайёҳлик идораси раҳбари Жан-Франсуа Риалнинг сўзларига кўра, Париждаги зўравонликлар тўлқини муносабати билан бронь қилишлар оммавий равишда бекор қилинган.

“Ўйлашимча, июль ойи бошида Парижда сайёҳлар 20-25% учишни бекор қилади. Агар бу рақамлар бутун Францияда бир хил бўлса, ҳайрон бўлмайман”, дейди у.

Риалнинг қўшимча қилишича, америкалик сайёҳларнинг тахминан 15 фоизи аллақачон Францияга учиш ҳақидаги фикрини ўзгартирган ва бу мамлакат туризм саноатига жиддий зарба бермоқда.

“Йил бошидан бери Парижга америкалик саёҳатчилар сони 25 фоизга ошганди, бу Россия ва Хитойдан сайёҳлар етишмаслигини қоплаганди”, дейди сайёҳлик идораси раҳбари.

Маълумот учун, Франция дунёда энг кўп сайёҳ ташриф буюрувчи давлат ҳисобланади.

Эслатиб ўтамиз, аввалроқ Озарбайжон Ташқи ишлар вазирлиги мамлакат фуқароларини Францияга саёҳат қилишдан тийилишга чақирганди.

Франциядаги вазият 

Жорий йилнинг 27 июнь куни Парижга яқин Нантер шаҳрида йўл ҳаракати қоидаларини бузган Наэль исмли 17 ёшли жазоирлик йигитни полиция тўхтатган. Бироқ Наэль полицияга бўйсунмаган. Полициячи эса унга қарата ўқ узган. Ҳайдовчи кўкрагига ўқ тегиб вафот этган.  

Шундан сўнг, мамлакатнинг турли шаҳарларида тартибсизликлар бошланган. 29 июнь куни бир неча ўнлаб полиция машиналари, комиссарлик ва маъмурий органлар бинолари ёқиб юборилган, таълим муассасаларига зарар етказилган. 30 июнга ўтар кечаси Ички ишлар вазирлиги давом этаётган тартибсизликларни бостириш учун 40 минг полициячини сафарбар этган. Мамлакатнинг айрим шаҳарларида махсус кучлар кўчаларни патруль қилишда зирҳли техника ва вертолётлардан фойдаланган.

Айрим шаҳарларда соат 21:00 ёки 22:00 дан бошлаб комендантлик соати, шунингдек, тунги вақтда жамоат транспортида чекловлар жорий этилган. Мамлакатда вазият кескинлигича қолмоқда.

Франция Президенти Эммануэль Макрон Twitterʼда марҳумнинг оила аъзолари ва яқинларига ҳамдардлик билдирган. Шунингдек, Макрон Франциядаги тартибсизликлар ортидан ЕИнинг Брюсселдаги саммитини тарк этган. 

Бундан ташқари, Франция Президенти тартибсизликларга компютер ўйинлари сабаб бўлганини айтганди. Франциядаги тартибсизликлар ортидан Бельгия ва Щвейцарияда ҳам намойишлар бўлди.