Савдо уруши: Apple Ҳиндистондан АҚШга 5 та самолётда iPhone юборди

Apple корпорацияси АҚШ Президенти Дональд Трамп томонидан жорий этилган янги импорт божлари кучга киришидан олдин, март ойининг охирида уч кун ичида Ҳиндистондан АҚШга iPhone ва бошқа маҳсулотлар билан тўлдирилган бешта юк самолётини юборди. Бу ҳаракат компанияга янги божлар таъсирини юмшатиш ва маҳсулот нархларини оширишнинг олдини олиш имконини беради. Бу ҳақда “The Times of India” хабар берди.  

Қайд этилишича, Трамп маъмурияти томонидан апрель ойида жорий этилган янги божлар Ҳиндистондан импорт қилинган товарларга 10 фоиздан 26 фоизгача, Хитойдан эса 54 фоизгача бож тўлашни назарда тутади. Шу сабабли, Apple ўз маҳсулотларини АҚШга етказиб беришни тезлаштирди, бу эса компанияга янги божлар кучга киргунга қадар маҳсулотларни олиб кириш имконини берди.

north_east

iPhone 17 дизайнида катта ўзгариш бўлади – “Bloomberg”

Apple бу ҳаракати билан компаниянинг АҚШдаги омборларида бир неча ойга етадиган маҳсулот захирасини тўлдирди. Бу эса маҳсулот нархларини вақтинча оширмасликка ёрдам беради. 

Apple сўнгги йилларда ўз ишлаб чиқаришини диверсификация қилишга ҳаракат қилмоқда, жумладан, Ҳиндистонда iPhone йиғишни кенгайтирмоқда. Бу нафақат Хитойга боғлиқликни камайтириш, балки Ҳиндистоннинг ўсиб бораётган смартфон бозоридаги имкониятлардан фойдаланиш мақсадида амалга оширилмоқда. 

Эслатиб ўтамиз, аввалроқ янги божлар туфайли iPhone нархлари сезиларли даражада ошиши мумкинлиги хабар қилинганди. Масалан, iPhone 16 Pro модели учун бу ошиш тахминан 300 долларни ташкил қилиши мумкин.