Самарқандда нотаниш аёлнинг уйига кирган икки эркак қўлга олинди

Самарқанд вилояти Каттақўрғон шаҳрида аёл кишининг уйига рухсатсиз кирган икки эркакка нисбатан маъмурий иш очилди. Бу ҳақда вилоят Ички ишлар бошқармаси матбуот хизмати хабар берди. 

Қайд этилишича, Ички ишлар бошқармаси ходимлари Каттақўрғон шаҳар “Ғарибмасжид” МФЙ ҳудудида хизмат олиб бораётган вақтда Н.Р. исмли аёл уйига нотаниш икки эркак кирганини айтиб, мурожаат қилган. 

Шундан сўнг, профилактика инспекторлари уларни ушламоқчи бўлган пайтда қонуний талабларга бўйсунмай, ходимлардан қочишга уринган ва фаол қаршилик кўрсатиб жанжал чиқарган. 

Фуқаролар ушланиб, Ички ишлар бошқармасига олиб борилгач, уларга нисбатан Маъмурий жавобгарлик тўғрисидаги кодекснинг 45- (фуқароларнинг турар жойи дахлсизлигини бузиш), 183- (майда безорилик), 194-модданинг биринчи қисми (Ички ишлар органлари ходимининг қонуний талабларини бажармаслик) ва 194-моддаси (Ички ишлар органлари ходимларининг ўз хизмат бурчларини бажаришига қаршилик кўрсатиш) билан ҳужжатлар расмийлаштирилиб, Жиноят ишлари бўйича Каттақўрғон шаҳар судига юборилган.