Самарқандда 740 млн сўмлик олтинни ноқонуний пуллаётганлар ушланди 

Самарқанд вилоятининг Каттақўрғон туманида ноқонуний олтин савдосига чек қўйилди. Бу ҳақда Давлат хавфсизлик хизмати хабар берди.

Қайд этилишича,Самарқанд вилоятининг Каттақўрғон туманида тезкор тадбир ўтказилганда Навоий ва Самарқанд вилоятларида яшовчи, 1982, 1984 ва 1996 йилларда туғилган 3 нафар фуқаро қонунга хилоф равишда жами оғирлиги 475 граммни ташкил қилган 2 бўлак олтин қуймаларни харидорга 737 млн сўмга сотишга келишиб, олдиндан 500 млн сўм олган вақтда ашёвий далиллар билан ушланган.

Шунингдек, Давлат асиллик даражаси назорати инспекциясининг тегишли хулосасига кўра, 994 асиллик даражасидаги ушбу олтин қуймаларнинг соф оғирлиги 472 гр бўлиб, умумий қиймати 740,4 млн сўмни ташкил этгани маълум бўлган.

Ҳозирда мазкур шахсларга нисбатан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) 4-қисми “а” банди билан жиноят иши қўзғатилиб, тергов ҳаракатлари бошланган.

Тергов давомида мазкур шахсларнинг 2 нафари муқаддам судланган бўлиб, улардан бири ҳозирда ахлоқ тузатиш ишлари жазосини ўтаётгани маълум бўлган.

Эслатиб ўтамиз, аввалроқ Ўзбекистондан қуйма олтин бўлакларини чақалоқ таглиги ичига яширган ҳолда олиб чиқишга бўлган уриниш фош этилган эди.

Бунёд Келдибоев