Saida Mirziyoyeva Fransiyaning yetakchi kompaniyalari vakillari bilan uchrashdi

Bugun, 9 iyul kuni O‘zbekiston Prezidenti Administratsiyasi rahbari Saida Mirziyoyeva Fransiyaning yetakchi kompaniyalari vakillari bilan uchrashdi. Bu haqda u o‘zining Telegram-kanalida ma’lum qildi.

“Bugun Fransiya tadbirkorlari xalqaro harakati (MEDEF International) huzuridagi O‘zbekiston-Fransiya ishbilarmonlar kengashi raisi, “Orano” kompaniyasi direktorlar kengashi rahbari Klod Imoven boshchiligidagi yetakchi fransuz kompaniyalari vakillari bilan uchrashdim”, deydi Prezident Administratsiyasi rahbari.

Uning bildirishicha, uchrashuvdan maqsad energetika, ta’lim, suv ta’minoti tizimi, transport va shahar infratuzilmasi kabi ustuvor sohalarda hamkorlikni kengaytirish.

“Ushbu muzokaralar yaqinda Prezident Emmanuel Makron bilan bo‘lib o‘tgan oliy darajadagi muloqotimizning uzviy va mantiqiy davomidir”, deydi Saida Mirziyoyeva.

Eslatib o‘tamiz, avvalroq O‘zbekiston Prezidenti Administratsiyasi rahbari Saida Mirziyoyeva Fransiya Prezidenti Emmanuel Makronning qabulida bo‘lgani haqida xabar berilgan edi.