Садир Жапаров “Барселона” афсоналарига қарши майдонга тушади

Жорий йилнинг 30 август куни Қирғизистоннинг Бишкек шаҳрида Марказий Осиёнинг таниқли собиқ футболчилари ва Испаниянинг “Барселона” клуби афсоналари ўртоқлик учрашувида майдонга тушади. Мазкур баҳсда мамлакат раҳбари Садир Жапаров ҳам “Осиё афсоналари” таркибида ўйнайди. Бу ҳақда Президент Администрацияси раҳбари Дайирбек Орунбеков маълум қилди.

Ўзбекистонлик таниқли футбол ҳаками, Ўзбекистон футбол ассоциацияси вице-президенти Равшан Эрматов бошқариб борадиган Испаниянинг “Барселона” клуби афсоналари ва “Осиё афсоналари” ўртасида ташкил этилаётган ўртоқлик учрашувида Қирғизистон Президенти Садир Жапаров ҳам майдонга тушади. 

Давлат раҳбарининг Осиё жамоаси таркибида майдонга тушиши ҳақида хабар топган “Барселона” клуби мураббийи Алберт Феррер ижтимоий тармоқдаги саҳифасида қирғизистонликларга мурожаат қилиб, бу ҳолатни ижобий баҳолади. 

“Сизнинг омадингиз кулган, ҳозир сизда футбол ўйнай оладиган энг яхши Президент бор”, дейди у. 

Айтиш жоиз, мазкур учрашув эртага 29 август куни Жалолобод шаҳрида фойдаланишга топширилаётган 29-“Барселона” футбол академиясининг очилиш маросими фонида, байрам кайфиятини янада эсда қоларли даражада ўтказиш мақсадида ташкил этилмоқда. 

Шунингдек, бугун, 28 август куни “Барселона” клуби раҳбари Жоан Лапорта Қирғизистонга учиб келди. Тамчи аэропортида уни ва “Барселона афсоналари” жамоасини Бокс федерацияси раҳбари Қамчибек Ташиев кутиб олди. 

Маълумот учун, мамлакат пойтахтидаги Долон Умурзоқов номидаги стадионда ўтказиладиган баҳсда “Барса”нинг собиқ футболчилари: Роналдиньо, Ривалдо, Карлес Пуёл, Хавер Савиола, Роналд де Бур, Жулиано Белетти, Франческо Кокулар ва бошқалар иштирок этади.

“Осиё афсоналари” таркибида эса Ҳидетоши Наката, Андрей Канчелскис, Муҳсин Муҳаммадиев, Биродар Абдураимов, Сервер Жепаров сингари ўз даврининг маҳоратли футболчилари туп суриши кутилмоқда.