“S&P Global Ratings” Ўзбекистоннинг суверен кредит рейтингини эълон қилди

Жамият 1485
image

Жорий йилнинг 13 декабрида “S&P Global Ratings” агентлиги Ўзбекистон Республикаси суверен кредит рейтинги бўйича ўзининг навбатдаги ҳисоботини эълон қилди. Унга кўра, агентлик мамлакат суверен кредит рейтингини “BB-“ (“Барқарор”) даражасида сақлаб қолди. 

Ўзбекистон Республикаси суверен кредит рейтингини баҳолашда унинг: 

• Ташқи кредитор позицияси ва паст даражадаги давлат қарзи юки республиканинг кучли тарафи дея қайд этилган;

• Аҳоли жон бошига ялпи ички маҳсулотнинг (ЯИМ) камлиги ва пул-кредит сиёсатининг паст даражадаги мослашувчанлиги мамлакатнинг суверен рейтинг кўрсаткичини ошишини чекловчи омиллар сифатида келтирилган.  Таъкидланишича, қарорлар қабул қилиш жараёни марказлашган бўлиб, институтлар ўртасидаги ҳисобдорлик ва бир-бирини назорат қилиш тизими етарли даражада ривожланмаган. 

Қуйидагилар келгусида Ўзбекистоннинг кредит рейтингига ижобий таъсир этувчи омиллар сифатида санаб ўтилган: 

• Мамлакатнинг глобал иқтисодиётга интеграциялашуви ва давлат улушига эга корхоналар ислоҳоти натижасида иқтисодиётнинг ўсиш салоҳияти ва барқарорлигининг яхшиланиши; 

• Диверсификасиялашган давлат бюджети даромадлари базаси ва экспорт таркиби. 

Шу билан бирга, қуйидаги омиллар республиканинг кредит рейтинги баҳоларига салбий таъсир этувчи омиллар сифатида келтирилган: 

• Юқори импорт ва жорий ҳисоб операцияларининг бундан кейин ҳам қарз ва хорижий валюта резервлари ҳисобига молиялаштирилиши натижасида фискал ва ташқи баланснинг сезиларли даражада ёмонлашуви;

• Давлат улушига эга асосий корхоналар ҳолатининг ёмонлашуви натижасида шартли мажбуриятларнинг ортиши. 

Шунингдек, агентлик мамлакатда олиб борилаётган иқтисодий ислоҳотларга ўз фикрини билдирган. Хусусан: 

1) Кенг қамровли сиёсий ислоҳотлар республикадаги институтларни яхшилагани ва иқтисодиётнинг очиқлигини таъминлагани айтилган;

2). Ҳукумат институционал ислоҳотларда муваффақиятга эришаётгани эътироф этилган;

3) Давлат улушига эга корхоналар ислоҳотининг бошланиши “муваффақиятли” дея таърифланиб, уларнинг фаолиятини модернизация қилиш ва харажатларини қоплай олиш даражасига етказиш республиканинг иқтисодий ўсишига замин бўлиши таъкидланган;

4) Банк сектори ислоҳоти ҳукумат кун тартибидаги 2017 йилги иқтисодий ислоҳотлардан кейинги йирик ислоҳот сифатида қайд этилган.  Таъкидланишича, банк сектори ислоҳоти иқтисодиётдаги долларлашув даражасини пасайтиришга ва пул-кредит сиёсати самарадорлигини оширишга хизмат қилади;

5) 2019 йилги солиқ ислоҳоти солиқ базасини кенгайишига ва солиқларнинг йиғилиши даражасини оширишга олиб келиши мумкинлиги айтилган. 

Шу билан бирга, мамлакат учун давлат улушига эга корхоналар ислоҳоти ва тўғридан-тўғри инвестициялар ҳажмини ошириш Ҳукумат олдида турган вазифа бўлиб қолаётганига урғу берган.

Суннатилла Абдуллаев
Мақолага баҳо беринг
Баҳолаганлар: 18
Рейтинг: 2.9
t
×