“Россияликларни ўлдириш керак” деган Украина элчиси сиртдан қамоққа олинди

Россиянинг Москва шаҳар суди россияликларни ўлдиришга чақирган Украинанинг Қозоғистондаги собиқ элчисини 6 йилга озодликдан маҳрум қилди. Бу ҳақда Москва шаҳар судининг матбуот хизмати хабар берди.

Қайд этилишича, собиқ элчи Пётр Врублевский Москва судининг қарорига биноан сиртдан олти йил умумий тартибдаги колонияга ҳукм қилинган.
Элчининг адвокати Дмитрий Кирсановнинг таъкидлашича, элчининг баёнотлари жиноят таркибига кирмайди.

“У бу гапни умумий тарзда айтган, бу таҳдид сифатида баҳолаб бўлмайди”, деган элчининг адвокати.

Шунингдек, адвокат элчининг россияликларни ўлдириш ҳақидаги сўзлари ижтимоий тармоқларда рухсатсиз тарқатилгани, тергов жараёнида эса процессуал қоидабузарликларга йўл қўйилганини ҳам қўшимча қилган.

Кирсанов бу ҳукм устидан Москва шаҳар судига апелляция тартибида шикоят қилишини билдирган.

Маълумот учун, Пётр Врублевский 2022 йилда Қозоғистондаги Украина элчиси лавозимидан бўшатилган эди. Бу қарорга унинг Россия фуқароларига қарши кескин баёноти сабаб бўлган. 2022 йилнинг август ойида Россия Ташқи ишлар вазирлиги вакили Мария Захарова элчининг интервьюсини эълон қилган эди, унда Врублевский “Украина иложи борича кўпроқ россияликни ўлдиришга интилади” дея айтган эди.

Бу сўзлар Москва томонидан кескин танқид қилинган. Қозоғистон ТИВ бу баёнотни “қабул қилиб бўлмайдиган” деб баҳолаган. Шундан сўнг Врублевский узр сўраб, бу баёнотни “эмоционал зўриқиш ҳолатида айтилган” деб изоҳлаган.

2024 йилнинг августида Россия суди унга нисбатан сиртдан 6 йиллик қамоқ жазоси тайинлаган эди. Аммо 3 ой ўтиб, Москва шаҳар суди бу қарорни бекор қилиб, ишни қайта кўриб чиқиш учун юборган.

2025 йилнинг апрель ойида Украина Президенти Владимир Зеленский Врублевскийнинг ўрнига Қозоғистонга янги элчи – собиқ Туркманистондаги элчи Виктор Майкони тайинлаганди.

Эслатиб ўтамиз, аввалроқ Москванинг Басманний туман суди Эстониянинг Нарва музейи директори Мария Сморжевских-Смирновани сиртдан ҳибсга олган эди. У Нарва музейининг деворига икки йил давомида 9 май куни қон доғлари бўлган “Путин - уруш жиноятчиси” баннерини осиб қўйганликда айбланган.