Россиядан чиқариб юборилган мигрантларнинг қаерда экани яқинларига айтилади

Россияда депортациядан олдин махсус муассасаларга жойлаштирилган муҳожирларнинг қариндошлари уларнинг қаерда экани ҳақида хабардор қилинади. Бу ҳақда норматив-ҳуқуқий ҳужжатлар порталида тегишли ҳукумат қарори эълон қилинди.

Мигрантнинг турган жойи тўғрисида унинг иш ёки ўқиш жойидаги маъмуриятга, шунингдек, у бўлган давлатнинг ҳимоячисига, дипломатик ваколатхонасига ёки консуллик муассасасига ҳам хабар берилиши мумкин. Чет эл фуқаросининг жойлашган жойи тўғрисидаги маълумотларни қариндошларига топшириш учун махсус муассаса раҳбари ва унинг ўринбосарига сўров юборилиши керак.

Ҳужжатдан кўриниб турибдики, агар чет эл фуқароси Россияда жойлашган боланинг ёки муомалага лаёқатсиз шахснинг ягона қонуний вакили бўлса, Ички ишлар вазирлиги васийлик ва ҳомийлик органларини мигрантнинг турган жойи тўғрисида хабардор қилади. Агар махсус муассасага жойлаштирилган чет эл фуқароси вояга етмаган бўлса, унинг мавжудлиги тўғрисида ота-онаси ёки қонуний вакиллари хабардор қилиниши керак.

Ҳукуматнинг тегишли қарори 2025 йил 5 февралдан кучга киради.

Эслатиб ўтамиз, аввалроқ Россия ҳукумати Давлат Думасига миграция соҳасида ноқонуний хатти-ҳаракатлар содир этганлик, шу жумладан миграция органларида сохта рўйхатга олиш учун маъмурий ва жиноий жавобгарликни кучайтириш тўғрисидаги қонун лойиҳасини тақдим этиши ҳақида хабар берилганди. Шунингдек, мамлакат Президенти Владимир Путин Россиядаги миграция билан боғлиқ вазиятга изоҳ берганди.