Россияда полиция ўзбекистонлик эркакни Украинага урушга боришга мажбурлади – ОАВ

Россияда Ўзбекистон фуқаросига полиция томонидан куч ишлатилиб, Украинадаги урушга юборишга мажбурлангани айтилмоқда. Бу ҳақда “Настоящее время” хабар берди.

Телеканалга кўра, Юсуф исмли шахс Москвада ишлаган ва мигрантларга қарши рейддан сўнг ҳуқуқ-тартибот идоралари ходимлари томонидан ушланган. Мигрантнинг сўзларига кўра, полиция бўлимида унга нисбатан куч ишлатилиб, Мудофаа вазирлиги билан шартнома имзолашга мажбур қилинган.

“Улар менга “сен урушга борасан” дейишди. Мен эса мен Ўзбекистон фуқаросиман, шунинг учун урушга бормайман, деб жавоб бердим”, дейди у.

Юсуфнинг айтишича, у ерда унга босим ўтказилган ва уни урушга юборишга мажбурлашган.

“Мен бу можаро (уруш)да иштирок этишга мажбур эмаслигимни айтдим. Кейин улар паспортимни олишди ва менда кредит борлигини аниқлашди. Шунда улар таклиф қилишди: “Биз сенинг кредитингни ёпамиз, сен эса урушга борасан”. Шу пайтда мени икки марта тўпиғим остига дубинка билан уришди ва “нега бормайсан, борасан” дейишди. Кейин бўйнимдан ушлаб, деворга тираб қўйишди. Улар мен рози бўлмаслигимни англашди. Мен уларга элчихонага мурожаат қилишимни ва у ердан ёрдам олишимни айтдим. Ўн дақиқа ўтгач, мени қўйиб юборишди”, дейди мигрант.

Юсуф Россиядаги Ўзбекистон элчихонасига мурожаат қилган, бироқ унинг айтишича, у ердан ёрдам ололмаган. Ҳозирда у банкдан 400 минг рубль қарздор.

Ҳуқуқ фаоли Валентина Чупикнинг айтишича, Россия ҳукумати ҳозирда мигрантларнинг қарзларидан босим воситаси сифатида фойдаланиб, уларни урушга юборишга уринаётган ҳолатлар кузатилмоқда.

Юсуфнинг айтишича, элчихонага мурожаат қилганидан сўнг вазият яна такрорланган. Уни яна полиция тўхтатган, ҳужжатларини текширган ва унинг қарздорлигини аниқлаган. Кейин Ички ишлар вазирлиги ходимлари унга яна армия билан шартнома тузишни таклиф қилган. Юсуф элчихонага қўнғироқ қилган, бироқ унга жавоб берилмаган. У вақтинча ватанига қайтишга қарор қилган.

“Юсуф пул топиб, кредитини тўлаш учун Россияга қайтишга мажбур эканини айтмоқда. Аммо яна урушга юборишга уринишлар бўлишидан қўрқмоқда”, дейилади хабарда.

Маълумот учун, Ўзбекистон Республикаси Жиноят кодексининг 154-ва 154-1- моддаларида Ўзбекистон Республикаси фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши, шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиши тақиқланган ва тегишли жавобгарлик белгиланган. 

Эслатиб ўтамиз, аввалроқ Украина ҳудудида ҳарбий ҳаракатларда иштирок этган Ўзбекистон фуқароси – Фарғона вилоятининг Қўштепа туманида туғилган эркак 5 йил муддатга озодликдан маҳрум қилинганди. 2023 йилнинг 24 ноябрь куни у Россия Мудофаа вазирлиги билан бир йил муддатга ҳарбий хизматни ўташ бўйича шартнома имзолаган ва Украина Россия таркибида жанговар ҳаракатларда қатнашишга розилик билдирган. У ўзини мустақил деб эълон қилган Луганск халқ республикаси ҳудудида Россия томонида жанговар ҳаракатларда иштирок этиш учун борган. 

Чегарани кесиб ўтиш пайтида уларнинг колоннаси Украина томонидан дрон билан ўққа тутилган. Холиқов дрондан туширилган снаряд портлаши оқибатида бошининг чап чакка қисмидан, чап қўли, чап елкаси ва ўнг оёғидан жароҳат олган. У бир ой давомида даволанган Москвадаги шифохонада март ойида ўзига келган. Суд уни Жиноят кодексининг 154-моддаси 1-қисми (Чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) бўйича айбдор деб топиб, 5 йил муддатга озодликдан маҳрум қилган.