Rossiyada og‘ir ahvolda qolganlar O‘zbekistonga qaytarildi

Rossiyada og‘ir hayotiy vaziyatga tushib qolgan O‘zbekiston fuqarolariga amaliy yordam ko‘rsatilib, mamlakatga qaytarildi. Bu haqda Vazirlar Mahkamasi huzuridagi Migratsiya agentligining Rossiyadagi vakolatxonasi xabar berdi. 

Ma’lum qilinishicha, Sankt-Peterburg, Novosibirsk, Ufa va Yekaterinburg shaharlaridan Migratsiya agentligining Rossiyadagi vakolatxonasiga murojaatlar kelib tushgan va ularga yordam ko‘rsatilgan. 

Qayd etilishicha, ushbu shaxslarga HY-634, HY-9670, HY-9658 va HY-9662 reyslari orqali aviachiptalar olib berilgan. 

“Migratsiya agentligi xorijda og‘ir holatga tushgan fuqarolarimizga amaliy yordam ko‘rsatishni davom ettiradi”, deyiladi xabarda. 

Eslatib o‘tamiz, avvalroq Rossiyada ota-ona qaramog‘isiz qolgan, voyaga yetmagan O‘zbekiston fuqarosi mamlakatga olib kelingandi. Uning otasi mehnat migratsiyasida bo‘lib, hujjatlar noto‘g‘ri rasmiylashtirilgani bois o‘g‘lini vaqtinchalik saqlov markazidan olib keta olmagan.