Россияда ҳарбий округ қўмондони ўринбосари Валерий Мўминжонов ушланди

Россиядаги Ленинград ҳарбий округи қўмондони ўринбосари, генерал-майор Валерий Мўминжоновга нисбатан ўта йирик миқдорда пора олгани учун жиноий иш қўзғатилди. Бу ҳақда кеча, 2 сентябрь куни Россия Федерацияси Тергов қўмитаси хабар берди.

Тергов маълумотларига кўра, ҳарбий амалдор Россия Мудофаа вазирлигининг ресурслар билан таъминлаш бошқармаси бошлиғи лавозимида ишлаган ва ҳарбийларни кийим-кечак билан таъминлаш учун жавобгар бўлган даврида 20 миллион рублдан ортиқ миқдорда пора олган. Тергов қўмитаси маълумотларига кўра, Мўминжонов Мудофаа вазирлиги манфаатларини кўзлаб, Россия Федерациясининг Украинадаги ҳарбий амалиётлар зонасида, шу жумладан, тижорат компаниялари билан 1,5 миллиард рублдан ортиқ шартномалар тузишга кўмаклашган.

“Тергов давомида Мўминжонов ва унинг оила аъзоларининг Москва ва Воронеж шаҳарларидаги қиймати 120 миллион рублдан ортиқ бўлган кўплаб кўчмас мулк объектлари борлиги аниқланди, уларни сотиб олишнинг қонунийлиги текширилмоқда”, дейилади Тергов қўмитаси хабарида.

Маълумот учун, жорий йилнинг 29 август куни Тергов қўмитаси Россия Мудофаа вазирининг собиқ ўринбосари Павел Поповга нисбатан жиноий иш қўзғатганди. Тергов маълумотларига кўра, 2021 йилдан 2024 йилгача Попов “Патриот” боғи ишини ташкил қилиш учун масъул бўлган ва “бойиб кетган”. Шу куни Москвадаги 235-гарнизон ҳарбий суди Поповни 29 октябргача тергов изоляторига жўнатган. 

Россия Тергов қўмитаси маълумотларига кўра, ҳарбий амалдор боғ директори Вячеслав Аҳмедов ва Россия Мудофаа вазирлиги инновацион ривожланиш бош бошқармаси бошлиғи ўринбосари Владимир Шестеров билан тил бириктирган, уларга нисбатан ҳам жиноий иш қўзғатилган. Терговчилар таъкидлашича, Попов ўзининг шахсий мақсадлари учун “Патриот” боғи ҳисобидан қурилиш ва таъмирлаш ишларини уюштирган, Москва вилоятидаги уйига турли хил моддий бойликларни олиб борган.

Павел Попов узоқ вақт Россия собиқ мудофаа вазири Сергей Шойгу билан ишлаган: 2008 йилдан 2013 йилгача у Фавқулодда вазиятлар вазирлигида унинг ўринбосари бўлган. Попов 11 йил давомида мудофаа вазири ўринбосари лавозимида ишлаган ва икки ой аввал ишдан бўшатилган эди. Амалдор Шойгу жамоасидан қўлга олинган учинчи вазир ўринбосари бўлди: аввалроқ Тергов қўмитаси Дмитрий Булгаковни 1,3 миллиард рубллик коррупцион келишувлар учун, Тимур Ивановни эса 1,2 миллиард рубль пора учун ушлаган эди.