Россия Украина Қуролли Кучлари учун оғир қуролларнинг асосий “етказиб берувчи”сига айланди – WSJ

Россия армияси Украина учун энг йирик оғир қурол “етказиб берувчи”га айланган. Бу ҳақда Американинг “The Wall Street Journal” газетаси Украина армияси маълумотлари ва Oryx таҳлилчилари очиқ манбалардан олинган маълумотларга таяниб, хабар бермоқда.

Oryx маълумотларига кўра, Украина Қуролли Кучлари Россиянинг 460 та асосий жанговар танкини, 92 та ўзиюрар гаубицасини, 448 та пиёда аскарларини, 195 та зирҳли жанговар техникасини ва 44 та ялпи реактив ҳужум тизимини қўлга киритган. Украина томонидан қўлга олинган Россия ускуналарининг ҳақиқий сони бундан ҳам кўпроқ бўлиши мумкин, деб таъкидлайди WSJ.

Нашрнинг қайд этишича, Россия Федерациясининг Харьков вилоятида чекиниши вақтида Украина армияси катта миқдордаги техникани қўлга киритган, негаки рус қўшинлари оғир қуроллари ва ўқ-дориларни ташлаб кетишга мажбур бўлган.

Шу билан бирга, таҳлилчиларга кўра, Россия февраль ойидан буён Украинанинг 109 та танки, 15 та ўзиюрар артиллерия мажмуаси ва 63 та пиёда жанговар техникасини қўлга киритган.