Россия тинчлик таклиф қилмади, ультиматум қўйди – Зеленский

Украина Президенти Владимир Зеленский Россиянинг тинчликка эришиш бўйича таклифини “ультиматум” деб атади. Бу ҳақда РБК-Украина хабар берди.

“Россия гўёки тинчлик таклифини ёзди, ва у жуда яхши тушунади: у ерда ёзилганларнинг ҳеч бири Украина Конституциясига, қонунларига, халқаро ҳуқуққа ва украин халқининг хоҳишига мос келмайди. Россия таклиф қилаётган нарса тинчлик режаси эмас — бу ультиматум, у шундай қилиб ёзилганки, Украина ҳеч қачон уни бажара олмасин. Украина тинчлик учун ҳамма нарсага тайёр эканини кўрсатган. Лекин таслим бўлишдан бошқа ҳар қандай нарсага. Ростини айтайлик — агар у шунчаки ўт очишни тўхтатиш бўлса, нега ўт очишни тўхтатиш учун қандайдир шартлар бўлиши керак?” деди Зеленский.

Украина ва Россия ўртасидаги музокаралар ҳақида гапирар экан, Зеленский ҳозирча фақат алмашинув жараёнлари кетaётганини маълум қилди.

“Бу жараён қандай эканини кўряпсизлар, у осон эмас. Мендаги маълумотга кўра: Мудофаа вазиримиз россияликлар томонидан алоқалар учун масъул бўлган Мединский билан боғланиб турибди. Келишув шундайки, алмашинувлар якунлангандан сўнг тарафлар кейинги қадамни муҳокама қилади. Биз улар 20 ёки 21 санада якунланиши мумкин деб умид қиляпмиз”, деди у.

Зеленскийнинг таъкидлашича, Россия Президенти Владимир Путинни тўхтатиши мумкин бўлган ягона киши — бу АҚШ Президенти Дональд Трамп.

“Америка ва россияликлар орасидаги мулоқот илиқ суҳбатга ўхшайди, ва менимча, бундай муносабат билан Путинни тўхтатиб бўлмайди. Аксинча, у бундан хурсанд бўлади. Менимча, тоналлик ўзгариши керак. Путин шундоқ тушуниши керакки, Америка Украинага ёрдам беради. Санкциялар — бу биринчи қадам. Иккинчиси — армиямизга қўллаб-қувватлаш”, деди Зеленский.

Унинг сўзларига кўра, ёрдамни қисқартириш ҳақидаги ҳар қандай ишора ёки Украинани Россия билан бир даражага қўйишга уриниш — “чунончи, чуқур ноҳақлик”.

“Россия — агрессор. Ушбу урушни бошлаган ҳам айнан ўзи, ва у уни тугатишни хоҳламаяпти. Россияликларни фақат сўзлар билан тўхтатиб бўлмайди. Бу шундай поездки, унинг рулида ҳеч ким йўқ, лекин катта тезликда кетяпти. Путин ўз жамиятини пропаганда билан радикаллаштирди. Одамлар нафрат билан тўлдирилди — НАТОга, АҚШга ва Ғарбга нисбатан”, деди у.

Зеленскийнинг айтишича, Исроил Америкага Patriot ҳаво мудофаа тизимини таъмирлаш учун топширган. Унинг таъкидлашича, 2023 йил 7 октябрдаги воқеалардан сўнг Украина Исроилдан ҳаво мудофаа тизимлари сўрашни босим қилмаган, чунки у вақтда Исроил ички масалалар билан банд эди. Кейинчалик, Президентнинг сўзларига кўра, Украина Patriot тизимларининг эски моделларига умид қилиш мумкинлигини билиб олди.

"Яъни, ишлайдиган қурол бор, ва уни таъмирлаш учун донорлар ҳам бор. Исроилда шундай тизимлар бор эканки, улар бироз таъмирланса, ишлай олади. Миқдори ҳақида айтмайман — ростини айтсам, тўрттаси деб умид қилгандик, кимдир бошқа рақамни ҳам айтди", — деди Зеленский.

Унинг сўзларига кўра, бу тизим Украина ҳудудига ҳали етиб келмаган:

“Биз миннатдормиз, гўё бу биз учун деб. Гўё, чунки у ҳали бизда эмас. Агар у бизда бўлганида, мен айтган бўлардим — ҳа, Исроил бизга топширди. Лекин бу узун занжир орқали Америкага таъмирлаш учун юборилган. У ердан Украинага ҳали кирмаган”, дея хулоса қилди у.

Маълумот учун, 2 июнь куни Истанбулда Чираған саройида Россия ва украина орасида тинчлик музокараларининг иккинчи босқичи бўлиб ўтди. Россия делегациясига Президент ёрдамчиси Владимир Мединский,  Украина томонига Мудофаа вазири Рустам Умаров бошчилик қилди. Учрашув ёпиқ форматда ўтказилди. Россия томони Истанбулдаги тинчлик музокараларида Украина делегациясига келишув бўйича меморандумни топширди. Бунгача Украинанинг Россия томонига тақдим этган тинчлик таклифлари эълон қилинганди. Музокаралардан сўнг Рустам Умаров Россия тақдим этган ҳужжатни ўрганиш учун бир ҳафта керак бўлишини айтди.