Россия НАТОга ҳужум қилади – Стармер

Буюк Британия Бош вазири Кир Стармер Россия 2030 йилга бориб НАТОга ҳужум қилиши мумкинлиги ҳақида огоҳлантирди. Бу ҳақда у “The Guardian” нашрига берган интервюсида сўз очди.

Стармер Британия разведкаси хулосаларига таянган ҳолда мавжуд баҳолашларга кўра, Россиянинг НАТОга эҳтимолий ҳужуми 2030 йил атрофида содир бўлиши мумкинлигини айтган.

“Бизнинг разведка маълумотларимиз ва НАТОга аъзо бошқа давлатларнинг баҳоларига кўра, Россиянинг НАТОга ҳужуми 2030 йилда содир бўлиши мумкин. Шунинг учун бу масала биз учун қанчалик долзарб ва устувор эканини кўриб турибсиз”, деган Стармер.

Бош вазирнинг сўзларига кўра, ҳукумат томонидан ишлаб чиқилаётган мудофаа инвестициялари режаси мамлакатни ҳимоя қилиш учун зарур бўлган келажак имкониятларига қаратилган. У, шунингдек, бу режа янги иш ўринларини яратишга ҳам ёрдам беришини айтган. Режа яқин ҳафталарда эълон қилиниши кутилмоқда.

Шунингдек, НАТО баҳорда Россия ҳужуми юз берган тақдирда альянснинг шарқий қанотини ҳимоя қилиш учун Германия ва Нидерландия иштирокидаги 60 минг нафаргача ҳарбийдан иборат корпусни жойлаштиришга қарор қилган. Болтиқбўйи давлатларида эса доимий равишда фақат кичик ҳарбий қисм жойлаштирилади. Корпуснинг тўлиқ шахсий таркиби ва қуроллари зарурат туғилганда бир неча соат ичида минтақага тезда кўчириб ўтказилиши мумкин.

Эслатиб ўтамиз, аввалроқ Буюк Британия Бош вазири Кир Стармер АҚШ ва Россия етакчилари – Дональд Трамп ва Владимир Путинни танқид остига олганди. Стармер Яқин Шарқдаги уруш келтириб чиқарган энергетика инқирози, шунингдек, Украинадаги уруш бошланганидан кейин энергия ресурслари нархининг ошиши Буюк Британия иқтисодиётига сезиларли даражада таъсир қилаётганини айтган.