Россия кучлари Балаклей ва Изюмга қайта жойлашаётгани айтилди

Олам 11604
image

Балаклей ва Изюм вилоятларида жойлашган Россия қўшинлари Донецк йўналишидаги саъй-ҳаракатларни кучайтириш учун қайта тўпланиб, қайта жойлаштирилди. Бу ҳақда бугун, 10 сентябрь куни Россия Мудофаа вазирлиги расмий вакили, генерал-лейтенант Игорь Конашенков маълум қилди. 

“Донбассни озод қилиш бўйича махсус ҳарбий операциянинг белгиланган мақсадларига эришиш учун Балаклей ва Изюм вилоятларида жойлашган Россия қўшинларини Донецк йўналишидаги саъй-ҳаракатларни кучайтириш учун қайта тўплаш тўғрисида қарор қабул қилинди”, дейди Конашенков. 

Россия Мудофаа вазирлиги расмий вакилининг сўзларига кўра, бунинг учун уч кун ичида Изюм-Балаклей қўшинлари гуруҳини қисқартириш ва ДХР ҳудудига ўтказиш бўйича операция ўтказилган. Шу билан бирга, қўшинларнинг ҳақиқий ҳаракатларини белгилаш билан чалғитиш ва намойиш қилиш тадбирлари ўтказилган.  

“Россия қўшинларига зарар етказмаслик учун авиация, ракета қўшинлари ва артиллериядан фойдаланган ҳолда душманга кучли ёнғин зарбаси берилди”, дея қўшимча қилди у. 

Россия Федерацияси Мудофаа вазирлиги арафасида рус қўшинларининг Харьков йўналишига ўтказилиши тасвирланган видеони эълон қилди. Видеода БТР-82А ва Д-20 тортма гаубицалари билан ҳарбий карвоннинг ҳаракати акс этган. Видеода Z ва V белгиларидан ташқари ҳарбий техникада янги белги – учбурчакдаги айлана тасвирланганини кўриш мумкин.

Эслатиб ўтамиз, аввалроқ Украина Қуролли Кучлари Харьков вилоятининг энг йирик шаҳарларидан бири Купянскни озод қилгани, тан олинмаган ДХР ахборот вазири ўринбосари Даниил Безсоновга кўра, Россия қўшинлари Купянскдан 70 километр жануби-ғарбда жойлашган Изюм шаҳрини ҳам тарк этгани хабар қилинган эди. 

Qalampir.uz Tahririyati
Мақолага баҳо беринг
Баҳолаганлар: 379
Рейтинг: 3
t
×