Россия Кривой Рогга ракета зарбаси берди. Тўрт киши ҳалок бўлди (видео)

Россия армияси Украинанинг Днепропетровск вилояти Кривой Рог шаҳридаги турли объектларга ракета зарбаси йўллади. Бу ҳақда вилоят маъмурияти раҳбари Сергей Лисак маълум қилди. 

Лисакнинг сўзларига кўра, ўқув муассасаси ва турар-жой биноларига зарар етган. Ҳозирча аниқланган маълумотларга кўра, ҳужум оқибатида тўрт киши ҳалок бўлган, етти киши яраланган. Улардан тўрт нафари шифохонага ётқизилган.

Украина Президенти Владимир Зеленскийнинг билдиришича, ҳужумда баллистик ракеталар қўлланган. 

“Ҳар бир шундай террорчилик ҳаракати биз ким билан муносабатда эканимизни эслатиб туради. Россия ўз-ўзидан тўхтамайди – уни бутун дунёда ҳаёт қадрини тушунадиганлар биргаликда босим ўтказибгина тўхтата олади”, деб ёзди Зеленский ўзининг Telegram-каналида. 

Давлат раҳбари тўрт киши ҳалок бўлгани ҳақидаги маълумотни тасдиқлаган ва ҳужум фуқаролик инфратузилмасига қаратилганини таъкидлаган. Хусусан, турар-жой бинолари, ўқув муассасаси ва шаҳар инфратузилмаси объектлари зарар кўрган. Фавқулодда вазиятлар хизмати ходимлари қутқарув операцияларини олиб бормоқда.

Маълумот учун, Россия армияси Украина ҳудудида фуқаролик объектларига доимий равишда зарба бериб келмоқда. Масалан, ўтган йилнинг ноябрь ойида Кривой Рог шаҳрида баллистик ракета тўққиз қаватли уйга тегиб, бир аёл ва унинг уч нафар фарзанди ҳалок бўлган, 14 киши яраланган эди.

Эслатиб ўтамиз, аввалроқ Россиянинг Брянск вилояти Украина Қуролли кучлари томонидан ракета зарбасига учраган эди. Зарба оқибатида жабрланганлар бўлмаган. Зарба Сельцо шаҳрида жойлашган Брянск кимё заводига қаратилган. Россиянинг “Техмаш” холдинги таркибига кирувчи ушбу завод давлат мудофаа буюртмаларини бажариш билан шуғулланади. Корхона турли синфдаги ўқ-дорилар ва ракеталар ишлаб чиқаришга, шунингдек, реактив тизимлар учун снарядлар йиғишга ихтисослашган. Заводнинг қуввати 30 дан ортиқ турдаги портловчи моддалар ишлаб чиқаришга имкон беради.