Россия-КХДР иттифоқига Беларусь ҳам қўшилмоқчи

Бугун, 15 сентябрь куни Россиянинг Сочи шаҳрида Россия Президенти Владимир Путин ва Беларусь фуқароси Александр Лукашенконинг музокаралари бўлиб ўтди. Бу ҳақда Кремль матбуот хизмати хабар берди.

Суҳбат бошланишида Россия раҳбари мавқедошини КХДР етакчиси Ким Чен Ин билан учрашуви ҳақида хабардор қилишини айтган.

“Яқинда мен КХДР раҳбари билан учрашдим, бу ҳақда биласиз. Мен сизга минтақадаги вазият бўйича муҳокама қандай ўтгани ҳақида маълумот бермоқчи эдим”, деган Путин.

Ўз навбатида, Лукашенко Путинга уч томонлама ҳамкорлик ҳақида ўйлашни таклиф қилган.

“Сиз ва Ким Чен Инни “Восточний” космодромида кўриш жуда қувонарли. Чунки ўзим ҳам у ерда бўлганман. Биз сиз билан бу космодромга аввалроқ ташриф буюрганмиз. Ўйлайманки, биз уч томонлама ҳамкорлик ҳақида ўйлашимиз керак. Шимолий Корея, Россия... Биламан, корейслар бунга катта қизиқиш билдирмоқда. Ўйлайманки, Беларусга ҳам ҳамкорликда иш топилади”, деган Лукашенко.

Владимир Путин эса КХДР раҳбари билан учрашувида минтақадаги ҳолат ва “энг долзарб масала” – Украина инқирози атрофидаги вазиятни муҳокама қилганини айтган.

Маълумот учун, Лукашенко ва Путин охирги марта жорий йилнинг 23 июлида Санкт-Петербургдаги Константиновск саройида учрашган, эртаси куни эса улар Валаам оролига борган.

Эслатиб ўтамиз, жорий йилнинг 13 сентябрь куни Шимолий Корея етакчиси Россияда Президент Путин билан кўришганди. 

Учрашув ҳақида тайёрланган видеони QALAMPIR.UZ'нинг YouTube саҳифасида томоша қилишингиз мумкин