Россия Киевга яна ракета ҳужуми уюштирди

Украина пойтахти Киев бугун, 8 июльга ўтар кечаси Россиянинг ракета ҳужумига учради. Ҳужум оқибатида ёнғинлар юз бериб, камида икки киши жароҳатланган. Бу ҳақда Киев шаҳар мэри Виталий Кличко Telegram орқали маълум қилди.

Қайд этилишича, зарбалар Днепр дарёсининг икки қирғоғида жойлашган ҳудудлардаги омборхона ва турар жой бўлмаган бинода ёнғин чиқишига сабаб бўлган. Мэрнинг айтишича, икки киши жароҳат олган бўлиб, улардан бири шифохонага ётқизилган.

Ҳаво ҳужуми хавфи ҳақидаги огоҳлантириш тахминан бир соат давом этган. Шунингдек, кечқурун Россиянинг мамлакат жанубидаги Одесса портига уюштирган ракета ҳужуми натижасида 10 киши жароҳатланган. Бу ҳақда Одесса вилояти губернатори Олег Кипер маълум қилган.

Унинг сўзларига кўра, жабрланганларнинг саккиз нафари шифохонада даволанмоқда.

Эслатиб ўтамиз, 6 июль куни Украина Россиянинг энг йирик нефтни қайта ишлаш заводларидан бири Омскка зарба берган эди.