Россия Киевга яна баллистик ракета учирди. Қурбонлар бор (видео)

Бугун, 1 августга ўтар кечаси Россия томонидан Киевга уюштирилган кенг кўламли баллистик ракета ҳужумлари оқибатида 9 киши ҳалок бўлди, 27 киши жароҳат олди. Бу ҳақда Украина Фавқулодда вазиятлар давлат хизмати маълумотига таяниб, “Укринформ” хабар берди.

Маълум қилинишича, пойтахтнинг бешта туманида ёнғинлар ва вайронагарчиликлар қайд этилган.

Соломянский туманида икки киши ҳалок бўлган, саккиз киши, жумладан икки бола жароҳат олган. Манзиллардан бирида беш қаватли турар жой биносининг бир қисми қулаб тушиб, ёнғин юзага келган. Бошқа ҳудудда эса автотураргоҳдаги автомобиллар ёниб кетган. Уч киши шифохонага ётқизилган. Қутқарувчилар юқори қаватлардан 35 кишини эвакуация қилиб, ёнғинни ўчирган.

Дарницкий туманида маъмурий бино ва яна бир нотурар жой биносида ёнғин ҳамда вайронагарчилик кузатилган. Бошқа манзилда автомобиль ёниб кетиб, яқин атрофдаги бинолар шикастланган. Мазкур туманда 7 киши ҳалок бўлган, яна 14 киши, жумладан икки бола жароҳат олган. Қутқарувчилар ёнғинларни бартараф этган. Шунингдек, боғлардан бирида ракета зарбаси оқибатида ҳосил бўлган чуқур аниқланган, кўчалардан бири бўйлаб бир неча жойда ёнғин юзага келган.

Шевченкивский туманида нотурар жой биносида ёнғин чиқиб, бир нечта тез ёрдам машинаси ёниб кетган. Ҳудудлардан бирида бир киши жароҳат олган. Бундан ташқари, киностудия ҳудудида ҳам ёнғин юзага келган ва у назорат остига олинган.

Днепровский туманида дўкон биноси шикастланган.Печерский туманида эса тўртта хусусий турар жой ва хўжалик биноларига зарар етган.

Фавқулодда вазиятлар давлат хизмати маълумотига кўра, ҳодиса жойларида қутқарувчилар ва бошқа тезкор хизматлар иш олиб бормоқда. Ҳозиргача 105 киши қутқариб олинган.

Эслатиб ўтамиз, аввалроқ АҚШ Президенти Дональд Трамп мамлакат ҳали Украинага Patriot ракета тизимлари учун ракеталарни ишлаб чиқариш лицензиясини беришга розилик бермаганини, аммо бу борада музокаралар давом этаётганини айтганди. Гап шундаки, Россиянинг ҳаво ҳужумлари кучайгани сабабли Украина Patriot тизимлари учун ракеталар танқислигига дуч келмоқда. Patriot ҳозирча Украина ихтиёридаги баллистик ракеталарни йўқ қила оладиган ягона тизим ҳисобланади.