Россия халқ артисти Нина Ургант вафот этди

Бугун, 3 декабрь куни театр ва кино актрисаси, Россия халқ артисти Нина Ургант вафот этди. У 92 ёшда эди. Бу ҳақда ТАСС ёзмоқда.  

У 1929 йил 4 сентябрда Луга шаҳрида туғилган. 

Иккинчи жаҳон уруши йилларида Нина Ургант онаси билан босиб олинган ҳозирги Латвия Республикасида яшаган. Урушдан кейин оила Ленинградга кўчиб ўтган. Мактаб йилларида у ҳаваскорлар театр студиялари спектаклларида қатнашган – қўшиқ куйлаган ва гитара чалган. 

1953 йилда Нина Ургант А.Н.Островский номидаги Ленинград театр институти (ҳозирги Россия давлат санъат институти)ни тамомлаган. 

1953-1954 йилларда ҳозирги Россия давлат академик драма театрида фаолият юритган. 

1954-1962 йилларда у Ленинград театрида хизмат қилган. 

1962 йилдан 2021 йилгача Нина Ургант Россия Миллий драма театрида ишлаган. У 30 дан ортиқ спектаклларда роллар ижро этган. 

Нина Ургант кино актрисаси сифатида кенг танилган. У 50 дан ортиқ фильм ва сериалларда роль ижро этган. 

У Россия Федерацияси Кинематографлар уюшмасининг аъзоси эди. 

У уч марта турмушга чиқди. Биринчи турмуш ўртоғи – актёр Лев Милиндер (1930-2005). У билан никоҳдан ўғли Андрей Ургант дунёга келган. Набираси – шоумен,  телебошловчи Иван Ургант (1978 йилда туғилган). Нина Ургантнинг иккинчи эри актёр Геннадий Воропаев (1931-2001), учинчиси – хореограф Кирилл Ласкари (1936-2009).