Россия қўшинлари Украинага дрон ва ракета билан ҳужум қилди

Кеча, 27 октябрь куни Россия қўшинлари камикадзе-дронларни Украина ҳудуди бўйлаб учирди. Бу ҳақда Украина Қуролли кучлари Ҳарбий ҳаво кучлари қўмондонлиги хабар берди.

“Ҳужум икки гуруҳ дронлар томонидан амалга оширилди”, дейди Украина Қуролли кучлари “Жанубий” оператив қўмондонлиги вакиллари.

Уларнинг айтишича, олтита дрон икки соатлик фарқ билан Харьков ва Николаев вилоятлари бўйлаб учирилган.

Украина ҳарбийларининг маълум қилишича, бешта дрон ҳаво ҳужумидан мудофаа тизимлари томонидан уриб туширилган. “Жанубий” оператив қўмондонлик хабарига кўра, яна бир учувчисиз самолёт Николаев вилоятидаги инфратузилма объектига урилган – ёнғин содир бўлган, у тезда ўчирилган, ҳеч ким жабрланмаган.

Бундан ташқари, Украина Ҳарбий ҳаво кучлари қўмондонлиги Россия қўшинлари Воронеж вилоятидан учирилган “Искандер” ракетаси билан Украинага ҳужум қилгани ҳақида хабар берган. Украина Ички ишлар вазирлиги раҳбари Игорь Клименконинг айтишича, ракета Харьков вилояти Изюм шаҳридаги ўт ўчириш бўлими биносига келиб тушган. Саккиз нафар қутқарувчи тан жароҳати олган, улардан тўрт нафари шифохонага ётқизилган, ўт ўчириш бўлими биноси ва 13 дона техника шикастланган.