Россия қўшинлари Киев ва Одессага камикадзе дронлари билан ҳужум қилди

Бугун, 4 майга ўтар кечаси Россия қўшинлари Эроннинг “Shahed-136/131” учувчисиз самолётлари билан Украинага ҳужум қилди. Бу ҳақда Украина ҳарбий-ҳаво кучларига таяниб, “Новая газета Европа” хабар берди.

Украина ҳарбийларининг маълумотларига кўра, жами 24 та дрон учирилган, улардан 18 таси йўқ қилинган. Дронлар Брянск вилоятидан ва Азов денгизидан учирилган.

Одесса вилояти ҳарбий маъмурияти вакили Сергей Братчук эса вилоятга 15 та “Shahed” етиб келгани, улардан 12 таси йўқ қилингани, учтаси таълим муассасаларидан бирининг ётоқхонасига тушиб қолганини маълум қилган. 

Шунингдек, Киев шаҳар ҳарбий бошқармасида ҳам дронларнинг ҳужуми ҳақида хабар берилган. Унга кўра, Киевга Эроннинг камикадзе дронлари ва “баллистик типдаги ракеталар” ҳужум қилган. Уларнинг сони ҳали аниқланмаган. 

Бундан ташқари, Украинанинг кўплаб ҳудудларида, хусусан, Суми, Запорожье, Одесса вилоятларида ҳаво ҳужуми ҳақида огоҳлантириш сигнали ва портлашлар овозлари эшитилган. Пойтахтда сигнал 3,5 соатдан ортиқ давом этди.

Эслатиб ўтамиз, кеча, 3 май куни Кремль Украинанинг икки учувчисиз самолёти Кремлда Президент маъмуриятига ҳужум қилишга уринганини маълум қилганди. Бмроқ Украина Президенти Владимир Зеленский воқеага алоқадорлиги ҳақидаги айбловларни рад этди.