Rossiya floti qudratini namoyish etuvchi dengiz paradi qanday o‘tdi? (video)

Bugun, 30 iyul kuni Rossiyada Harbiy-dengiz kuchlari kuni munosabati bilan Sankt-Peterburg va Kronshtadtda Asosiy dengiz paradi bo‘lib o‘tdi. Unda mamlakat Prezidenti Vladimir Putin ham qatnashdi. 

Davlat rahbari karterda Finlyandiya ko‘rfazi, Neva va Kronshtadt yo‘llari suvlaridagi harbiy kemalarning parad qatorlarini aylanib o‘tdi, ularning ekipajlari shaxsiy tarkibini Harbiy-dengiz floti kuni bilan tabrikladi.
Parad ochilishida so‘z olgan Putin Rossiya o‘z dengiz flotining qudratini izchil oshirayotgani, shu yilning o‘zida u har xil toifadagi o‘nlab kemalar bilan to‘ldirilishini aytdi. 

“Bugungi kunda Rossiya o‘z floti qudratini izchil oshirib, milliy dengiz siyosatining keng ko‘lamli vazifalarini ishonch bilan amalga oshirmoqda. Birgina joriy yilning o‘zida flot turli toifadagi 30 ta kema bilan to‘ldirilmoqda”, dedi Putin.

Uning ta’kidlashicha, jangovar xizmatni boshlaganlar orasida afsonaviy brigada jamoasining jasorati xotirasiga atalgan Merkuriy raketa korveti ham bor. 

“Rossiya floti kemalariga uning nomini berish an’anasi qayta tiklangani quvonarli. Yangi Merkuriyda ham dengiz an’analarimiz daxlsizligi belgisi, harbiy dengizchilarning jasorati, mardligi va yengilmasligi ramzi sifatida Avliyo Georgiy dengiz bayrog‘i ko‘tarildi. Bu fazilatlar bugungi kunda to‘liq namoyon bo‘lmoqda. Rossiya nomidan dengizchilarimiz bor kuchlarini berib, chinakam qahramonlik ko‘rsatmoqdalar, buyuk ajdodlarimiz kabi mardonavor kurashmoqda”, dedi Rossiya Prezidenti.

Paradda Putindan tashqari yana 4 ta Prezident qatnashdi. Ular Rossiya-Afrika sammitidan keyin Sankt-Peterburgda qolgan edi. Bundan tashqari, Rossiya-Afrika forumida ishtirok etgan yana beshta davlatning “quyi darajadagi” vakillari paradda qatnashdi.

Ma’lumot uchun, bu yil paradda 45 ta kema, kater va suv osti kemalari, shuningdek, 3000 ga yaqin harbiy xizmatchilar ishtirok etdi. Tadbir harbiy xizmatchilarning parad ekipajlari, dengiz flotining oliy o‘quv yurtlari talabalari va Yunarmiya kichik ofitserlarining tantanali marshi bilan yakunlandi.