Россия дизель экспорти чекловини бутунлай бекор қилмоқчи эмас

Россия Энергетика вазирлиги ҳозирча дизель ёқилғиси экспортига қаратилган чекловларини бутунлай бекор қилмоқчи эмас. Бу ҳақда РИА Новости хабар берди.

“Ёзги дизель ёқилғиси учун тақиқни олиб ташлаш муҳокама қилинмоқда. Ҳозирча қишки дизель ёқилғиси учун чекловлар амалда", дея қайд этган Энергетика вазири Николай Шулгинов.

Маълумот ўрнида, Жорий йилнинг 21 сентябридан Россия бензин ва дизель ёқилғиси экспортига вақтинчалик чекловлар киритганди. Тақиқ вақтида ички ёқилғи бозорини тўлдириш ва нархларни пасайтириш кўзда тутилгани айтилганди. 

Россия Энергетика вазирлиги 17 ноябрдан автомобиль бензини экспортига қўйилган чекловлар бекор қилинганини маълум қилди.

Нефтни қайта ишлаш ҳажмини сақлаб қолиш туфайли профицит ҳосил бўлган ҳамда бензин захиралари 2 млн тоннага етган.

Шунга қарамай, Россия ҳукумати экспорт чекловларини зарурат юзага келганда қайтаришни истисно қилмаяпти.

Ўзбекистон Энергетика вазири Жўрабек Мирзамаҳмудов эса аввалроқ Россия томонидан бензин ва дизель ёнилғиси экспортига киритилган чекловлар Ўзбекистонга етказиб беришга таъсир қилмаганини ва давлатлар ўртасида ҳукуматлараро келишув тузилганини билдирган. Йил бошида Ўзбекистонга бензин импортининг аксар қисми Россия ҳисобига тўғри келган.