Россия Давлат Думаси қўзғолон учун умрбод қамоқ жазосини биринчи ўқишда маъқуллади
Олам
−
16 Октябрь 2666
Россия Давлат Думаси қуролли исёнда қатнашганлик учун жазони кучайтирувчи қонун лойиҳасини биринчи ўқишда қабул қилди. Ҳужжат 15 октябрь куни Дума сайтида эълон қилинди.
Вазирлар Маҳкамаси Россия Федерацияси Жиноят кодексининг 279-моддасига ўзгартириш киритишни таклиф қилмоқда. Қонун лойиҳасига кўра, Россия конституциявий тузумини ағдариш ёки мажбуран ўзгартириш ёки ҳудудий яхлитлигини бузиш мақсадида исён уюштирганлик ёки унга раҳбарлик қилганлик учун 15 йилдан 20 йилгача озодликдан маҳрум қилиш назарда тутилган.
Исёнда иштирок этиш 12 йилдан 20 йилгача озодликдан маҳрум қилиш билан жазоланади. Агар қўзғолон жиддий оқибатларга, жумладан ўлимга олиб келган бўлса, жазо 500 минг рублдан 1 миллион рублгача жарима билан 15 йилдан 20 йилгача қамоққа олиниши мумкин. Умрбод қамоқ жазоси ҳам тайинланиши мумкин.
Шунингдек, давлатга хиёнат бўйича 275-моддага ўзгартириш киритиш таклиф қилинмоқда. Агар қўзғолонга тайёргарлик ҳақида расмийларга хабар берилган бўлса, унда иштирок этганлик учун жиноий жавобгарликдан қочиш мумкин бўлади.
“Бундай қарор қуролли исён иштирокчиларини ноқонуний ҳаракатларни давом эттиришдан бош тортишга ундайди”, дейилади тушунтириш хатида.
Ҳукумат 24 июнь куни “Вагнер” хусусий ҳарбий компанияси асосчиси Евгений Пригожин қўзғолонининг бир йиллиги муносабати билан Давлат Думасига киритилган таклифларни маъқуллади.
"Агар қонунда сана бўйича эмас, қачон бўлишидан қатъи назар, бирор нарса этишмаса, ўзгартиришлар тайёрланиши ва киритилиши керак", деган Давлат Думаси Давлат қурилиш қўмитаси раисининг биринчи ўринбосари Юрий Синелшчиков.
Қонун мақомига эга бўлиш учун қонун лойиҳаси ҳали яна иккинчи ва учинчи ўқишдан ўтиши керак.
