Роналдунинг 77 млн долларлик самолёти Манчестер аэропортида қолиб кетди

Бир неча кун аввал Манчестер аэропортига келган Криштиану Роналдунинг хусусий “Bombardier Global Express 6500” самолёти таъмирталаб бўлганлиги учун мазкур аэропортда қолдирилди. Бу ҳақда “The Sun”хабар берди.

Манбага кўра, самолёт ойналаридан бирида ёриқ топилган, шу боис  янги ойна етказиб берилиши ва таъмирлаш ишлари олиб бориш учун Роналдунинг самолёти Манчестерда қолдирилган. Криштианунинг ўзи бортда бўлган-бўлмагани ҳақида маълумот йўқ. Самолётнинг Манчестерга келгани сабаби ҳам номаълум.

Маълумот учун, Криштиану 2003 йилдан 2009 йилгача “Манчестер Юнайтед”да ўйнаган, шунингдек, 2021 йилда жамоага қайтган. Аммо 2022 йил охирида у “Манчестер Юнайтед”нинг ўша пайтдаги бош мураббийи Эрик тен Хаг билан можаро туфайли Англияни тарк этишга мажбур бўлганди.

Португалиялик футболчи айни дамда Саудия Арабистони Про-лигасида пешқадамдан 8 очко ортда қолган ҳолда 3-ўринни эгаллаб турган  “Ал-Наср” жамоасида тўп сурмоқда.