Роналду “Юнайтед”дан кетиш фикридан қайтмаган

Португалия терма жамоаси ва “Манчестер Юнайтед” футболчиси Криштиану Роналду ҳамон инглиз клубини тарк этиш ҳақида ўйламоқда. Бу ҳақда “Manchester Evening News” нашри хабар берди.

Роналду “Манчестер Юнайтед” расмийларига ўтган ёзда ўзини трансферга қўйиш тўғрисида ариза топширган ва 37 ёшли футболчи ушбу аризасини қайтариб олмаган. Сабаби Криштиану қишки трансфер ойнасида яна бир бор “қизил иблислар” сафини тарк этишга уриниб кўради.

Қайд этиш керакки, Роналду ёзги трансфер ойнасида “Манчестер Юнайтед”ни тарк этиб, Европа Чемпионлар лигасида ўйнайдиган клубга ўтиши мумкинлиги ҳақида хабарлар тарқалган эди. Португалиялик футболчи фаолиятини “Барселона”, “Пари Сен-Жермен”, “Атлетико Мадрид” ва “Челси” каби клубларда давом эттириши мумкинлиги айтилди. Бироқ ҳеч қайси клуб Роналдуни сотиб олиш учун расмий таклиф юбормади.

Маълумот учун, Роналду “Манчестер Юнайтед”да 2021 йилдан буён тўп суради. Португалиялик ҳужумчи ва клуб ўртасидаги шартнома 2023 йилгача мўлжалланган. Жорий мавсумда Роналду “Манчестер Юнайтед” сафида барча мусобақаларда 8 та ўйинда майдонга тушиб, 1 та гол урди.