Роналду ўзбекистонлик футболчининг рақамини тортиб олдими? Машарипов изоҳ берди

"Ал-Наср"нинг ўзбекистонлик футболчиси Жалолиддин Машарипов Instagram'даги жонли эфирида Саудия Арабистони клубининг янги футболчиси Криштиану Роналду жамоада Машариповга тегишли бўлган 7-рақамда тўп тепишига изоҳ берди. 

Малум бўлишича, Машарипов ўз рақамини Роналдуга беришни истамагани ҳақидаги хабарлар ҳақиқатдан йироқ. 

"Ал-Наср"да қолиб, Роналдудан кўп нарсани ўрганаман. У замонамизнинг энг яхши футболчиларидан бири. Криштианудан ўрганишим керак бўлган кўп нарса бор", дейди Машарипов.

Қайд этилишича, Жалолиддин Машарипов Роналду трансфери эълон қилинмасидан анча аввал, аниқроғи 13 декабрда 7-рақамни бўшатиб, ўзига 77-рақамни танлаган. Буни клуб Матбуот хизмати эълон қилган суратлар орқали ҳам билиш мумкин. Орада Машарипов рақамни айнан Роналду учун бўшатганини ҳам тасдиқлади.

Эслатиб ўтамиз, 2022 йилнинг 31 декабрь Роналдунинг "Ал-Наср" клуби билан шартнома имзолагани маълум бўлди. Бунгача португалиялик футболчи "Спортинг", “Манчестер Юнайтед”, "Реал" ва Туриннинг "Ювентус" клубларида тўп сурган.