Роналду қандай футболчиларни ёқтирмаслиги маълум бўлди

“Ал-Наср” ва Португалия терма жамоаси ҳужумчиси Криштиану Роналду Португалия терма жамоасида ўйнашдан бош тортаётган футболчиларни ёқтирмайди. Бу ҳақда у футбол федерацияси матбуот хизматига берган интервьюсида айтди.

“Португалия терма жамоасида ўйнашни истамайдиган баъзи футболчилар мени ғазаблантирмоқда. Миллий терма жамоада ўйнашдан роҳатланинг, вақт тез ўтади! Ўз мамлакатингиз ва маданиятингизни намойиш этишдан кўра яхшироқ нарса йўқ”, дейди Роналду.

Терма жамоа таркибида Роналду Европа чемпионати ва UEFA Миллатлар лигасида ғолиб чиққан. Португалияда у тўрт марта йилнинг энг яхши футболчиси деб топилган, шунингдек, Криштиану Португалия терма жамоаси ва барча терма жамоалар тарихидаги энг яхши тўпурар (130 та гол) ҳисобланади.

Жорий мавсумда Криштиану Роналду “Ал-Наср” сафида барча мусобақаларда 15 та ўйинда иштирок этиб,  10 та гол ва 3 та голли узатмага муаллифлик қилди. Футболчининг клуб билан амалдаги шартномаси 2025 йилнинг ёзига қадар мўлжалланган. “Transfermarkt” порталида берилган маълумотларга кўра, футболчининг бозор қиймати 15 миллион еврони ташкил қилади.