Роналду бир ҳафтада икки марта хет-трикка эришди

“Ал-Наср”нинг португалиялик ҳужумчиси Криштиану Роналду профессионал клуб фаолиятидаги 65-хет-трикини қайд этди.

3 апрелга ўтар кечаси Саудия Арабистони чемпионатининг 26-туридан ўрин олган “Абҳа” билан ўйинда (8:0) 39 ёшли португалиялик форвард 3 та гол урди ва 2 та голли узатмани амалга оширди. Криштиану 3 та голдан иккитасини тўғридан тўғри жарима зарбаси орқали киритди. Шу тариқа, Роналду бир ҳафта ичида иккита хет-трик қайд этиб, хет-триклар сони бўйича “Интер Майами”нинг аргентиналик ҳужумчиси Лионель Мессидан (58) саккизтага ўтиб кетди.

Саудия Арабистони чемпионати тўпурарлари рўйхатида 29 та гол билан Криштиану Роналду етакчилик қилмоқда. Унинг энг яқин таъқибчи “Ал-Ҳилол” аъзоси Александр Митрович ҳисобида 22 та гол мавжуд.

Жорий мавсумда Роналду ўз клуби учун барча турнирларда 35 та ўйин ўтказиб, 36 та гол урди ва 12 та голли узатмани амалга оширди. Унинг клуб билан шартномаси 2025 йилгача мўлжалланган. “Transfermarkt” интернет порталига кўра, форварднинг нархи 15 миллион еврони ташкил қилади.