“Реал” ЕЧЛда 12 йиллик сериясини давом эттирди

13 апрелга ўтар кечаси Испания пойтахти Мадриддаги “Сантиаго Бернабеу” стадионида Европа Чемпионлар лигаси ( ЕЧЛ) чорак финалининг дастлабки ўйини бўлиб ўтди. Мезбон “Реал” Френк Лэмпард мураббийлигидаги Лондоннинг “Челси” клубини қабул қилди. Франциялик Франсуа Летексье бошқариб борган баҳсда “қироллик клуби” 2:0 ҳисобида зафар қучди.

Шу тариқа “қаймоқранглилар” Европа Чемпионлар Лигаси плей-офф босқичининг кетма-кет 31-ўйинида гол урди. Охирги марта клуб 2011 йилда рақиб дарвозасини ишғол қила олмаган – ўшанда “Барселона” “Реал”га қарши ўз дарвозаси дахлсизлигини сақлаб қолганди.

“Реал” - “Челси” учрашувидаги дастлабки гол 21-дақиқада Карим Бензема томонидан киритилди. Баҳсдаги иккинчи голга эса 74-дақиқада Марко Асенсио муаллифлик қилди. Ўйиннинг 59-дақиқасида “Реал” аъзоси Родриго рақиб жарима майдончасига кираверишда тўпни эгаллаб олди, вазиятни бой берган “Челси” аъзоси Бен Чилвелл бразилиялик футболчининг қўлидан ушлаб олишдан бошқа чора топмади ва англиялик футболчи қоидабузарлик учун тўғридан-тўғри қизил карточка олди.

Жамоаларнинг жавоб ўйини 19 апрелга ўтар кечаси бўлиб ўтади. Ўйин Тошкент вақти билан соат 00:00 да старт олади.