“Реал” президентлигига номзод жамоага Клоппни олиб келишга ваъда берди

“Реал Мадрид” президентлигига номзод Энрике Рикельме клубга Юрген Клоппни таклиф қилиш нияти борлигини расман маълум қилди. Бу ҳақда у ўзининг сайлов олди дастурида айтиб ўтди. 

Рикельме ўз баёнотида сайловларда ғалаба қозонган тақдирда, “Реал Мадрид” тарихида янги босқични бошлаш ва таниқли футбол мутахассисларига таянишни режалаштираётганини айтди.

Унинг сўзларига кўра, сайловдан сўнг дарҳол Рауль Гонсалес “Ливерпуль”нинг собиқ бош мураббийи Юрген Клопп билан боғланиб, унга клубнинг янги спорт лойиҳасини тақдим этади.

Рикельме Клоппни замонавий футболнинг энг яхши мураббийларидан бири деб ҳисоблашини таъкидлади. Унинг фикрича, немис мутахассисининг етакчилик фазилатлари, профессионализми ва юқори натижаларга эришиш қобилияти уни жамоани бошқариш учун муносиб номзодга айлантиради.

Баёнотда, шунингдек, Рауль келажакдаги лойиҳанинг муҳим қисми сифатида кўрилаётгани ва клубнинг спорт тузилмасида муҳим вазифани бажариши мумкинлиги қайд этилган.

Эслатиб ўтамиз, Юрген Клопп 2023-2024 йилги мавсум якунланганидан сўнг, “Ливерпуль”ни тарк этган эди. Шундан буён у бир неча бор яқин келажакда мураббийлик фаолиятига қайтишни режалаштирмаётганини таъкидлаб келмоқда.