“Реал Мадрид” “Олимпиакос”ни мағлуб этди

Кеча, 26 ноябрь куни UEFA Чемпионлар Лигаси 5-тур доирасида “Олимпиакос” ва “Реал Мадрид” ўртасида қизиқарли учрашув бўлиб ўтди. Мадридликлар сафарда 4:3 ҳисобида ғалаба қозониб, юнон жамоасининг ўз майдонидаги кетма-кет 10 та Европа учрашувидаги мағлубиятсиз сериясига барҳам берди.

Учрашув бошида ташаббус “Реал Мадрид” томонида бўлса-да, ҳисобни кутилмаганда мезбонлар очди. 8-дақиқада Чикиньо тезкор ҳужум якунида тўпни дарвозага йўллаб, “Олимпиакос”ни олдинга олиб чиқди. 22-дақиқада эса Винисиус Жуниорнинг аниқ узатмасидан кейин Килиан Мбаппе ҳисобни тенглаштирди. Франциялик юлдуз бунинг ортидан 24 ва 29-дақиқаларда яна иккита гол уриб, илк бўлимни мадридликлар фойдасига якунланишига сабаб бўлди.

Иккинчи бўлим бошида мезбонлар ҳужумга ўтди ва 52-дақиқада Меҳди Тареми бош билан аниқ зарба бериб, ҳисобни 2:3 кўринишига келтирди. Бироқ 59-дақиқада Мбаппе ўзининг тўртинчи голини уриб, фарқни яна икки тўп фарқига оширди. Шунга қарамай, “Олимпиакос” таслим бўлмади ва 81-дақиқада Аюб Эль-Кааби ҳисобни қисқартирди. Бироқ бу гол мезбонларга очко олиб келмади ва баҳс “Реал Мадрид”нинг 4:3 ҳисобидаги ғалабаси билан якунланди.

Шу тариқа, “Реал Мадрид” 5-турдан сўнг 12 очко жамғарган ҳолда гуруҳда 5-поғонага кўтарилди. “Олимпиакос” эса атиги 2 очко билан сўнгги ўринларда қолмоқда. Навбатдаги турда Хаби Алонсо шогирдлари ўз майдонида “Манчестер Cити”ни қабул қилади, грецияликлар эса “Қайрат”га қарши баҳс олиб боради.