“Реал” футболчилари ЕЧЛдаги кейинги ўйинни ўтказиб юбориш хавфи остида турибди

Мадриднинг “Реал” клуби бугун, 19 февраль куни Европа Чемпионлар лигаси дастлабки плей-офф босқичи жавоб учрашувида ўз майдонида “Манчестер Сити”га қарши ўйнайди. Мадрид клубининг 6 нафар футболчиси кейинги ўйинларда ҳам ўйнай олиш имкониятини сақлаб қолиш учун қоидабузарликлардан чекланиши керак.

Карло Анчелотти жамоасининг олти нафар футболчиси сариқ карточкалар йиғилиб қолгани учун дисквалификация хавфи остида. Гап Жуд Беллингем, Лука Модрич, Эндрик, Антонио Рюдигер, Орельен Чуамени ва Эдуардо Камавинга ҳақида кетмоқда. 

Карло Анчелоттининг ўзи ҳам сариқ карточка олса, “Реал”нинг Европа Чемпионлар лигасидаги навбатдаги ўйинини ўтказиб юбориши мумкин.

Манчестердаги биринчи ўйин “Реал”нинг 3:2 ҳисобидаги ғалабаси билан якунланган эди. Бугунги ўйинда дуранг натижа ҳам мадридликларни турнир нимчорак финалига олиб чиқади. 

Эслатиб ўтамиз, аввалроқ UEFA жамоаларнинг бўлажак ўйин учун тахминий таркибларини эълон қилганди.