Расман: Шоҳасан Мирзаматов ва Ҳамзат Чапановнинг жанги тасдиқланди

Ўзбекистонлик ММА устаси Шоҳасан Мирзматов навбатдаги жангини МПЛда Россия вакили Ҳамзат Чапановга қарши ўтказади. Бу хабарни промоушен масъуллари расман тасдиқлади. 

Унга кўра, ўзбекистонлик UFC жангчиси Маҳмуд Муродовга тегишли бўлган лига жорий йилнинг 16 сентябрь куни Тошкент шаҳрида навбатдаги турнирини ўтказади. Унинг марказий жангида эса айнан Шоҳасан Мирзматов ва Ҳамзат Чапанов ўзаро тўқнаш келади.

Маълумот учун, Шоҳасан Мирзаматов фаолияти давомида жами 12 та жангда қатнашиб, уларнинг 10 тасида қўли баланд келган ва 2 марта мағлубиятга учраган. У охирги жангини жорий йилнинг 22 июль санасида эронлик рақиби Азади-Фарга қарши ўтказиб, биринчи раунднинг ўзидаёқ нокаут эвазига ғалаба қозонган.

Ҳамзат Чапанов эса 15 та профессионал жангда иштирок этиб, уларнинг 12 тасида ғалабага эришган ва 3 марта рақибларига имкониятни бой бериб қўйган. У сўнгги жангини 2022 йилнинг декабрь ойида Россиянинг ММА Series лигасида ўтказиб, зафар қучган.