Путинга яқин кўриладиган пианиночи Тошкентда концерт бермоқчи

Жорий йилнинг 23 октябрь куни Тошкентда россиялик пианиночи Денис Мацуевнинг яккахон концерти бўлиб ўтади. Бу ҳақда Ўзбекистон Маданият ва санъатни ривожлантириш жамғармаси матбуот хизмати хабар берди. 

“2023 йил 23 октябрь куни “Ўзбекистон” халқаро анжуманлар саройи саҳнасида Денис Мацуевнинг “Яна бир бор. Генделдан Раҳманиновгача” номли яккахон концерти бўлиб ўтади”, дейилади хабарда. 

Қайд этилишича, Мацуев ўз концертида Бетҳовен, Шуберт, Шопен, Мошковский, Пуленк, Чайковский ва Сергей Раҳманиновнинг тож асарларини ижро этади.

Маълумот учун, пианиночи Денис Мацуевнинг жорий йилнинг 24 май куни Италиянинг Брешиа ва Бергамо шаҳарларида ўтказилиши режалаштирилган концертлари бекор қилинди. Уларда мусиқачи Сергей Раҳманинов, Игорь Стравинский ва Сергей Прокофьев асарларини ижро этиши керак эди. 

“Санъат тажовузга қарши” ташкилоти фаоллари концертларни бекор қилишни талаб қилиб, шаҳар мэрларига мурожаат қилган, Украинанинг Италиядаги элчиси Ярослав Мельник ҳам худди шундай илтимос билан шаҳар мэрларига расмий мактуб йўллаган. Интернетдаги петицияга эса 1000 дан ортиқ одам имзо чекган. 

Ноябрь ойида Венадаги Konzerthaus концерт зали Денис Мацуевнинг 16 февралга мўлжалланган концертини бекор қилганди. 

Денис Мацуев 2014 йилда Қримнинг аннексия қилинишини қўллаб-қувватловчи очиқ хатни имзолаган. Кейинчалик, у бир неча бор Владимир Путиннинг сиёсатини, шу жумладан Украинага нисбатан, Путинни 2018 йилги президентлик сайловига номзод сифатида кўрсатиш бўйича ташаббус гуруҳи ва Россия Конституциясига тузатишлар тайёрлаш бўйича ишчи гуруҳ аъзоси бўлганини маъқуллаган. Украинада кенг кўламли уруш бошланганидан сўнг, Швейцариянинг Сергей Раҳманинов жамғармаси Мацуевни ўз бошқарувидан чиқариб юборди. Латвияда Мацуев бошқа бир қатор кремлпараст рус маданият арбоблари қатори персона нон грата деб эълон қилинган.

Эслатиб ўтамиз, жамоатчиликнинг эътирозларидан сўнг кремлпараст хонанда Григорий Лепснинг Қозоғистон, Қирғизистон ва Ўзбекистонда режалаштирган концерт дастурлари бекор қилинган эди.