Путин ва Зеленский ўз табригида нималар ҳақида гапирди? 

Украина Президенти Владимир Зеленский Киев 2025 йилда урушни тугатиш учун ҳамма нарсани қилишини айтди. Бу ҳақда Украина раҳбарининг Янги йил мурожаати бугун, 1 январга ўтар кечаси давлат раҳбарининг  интернетдаги расмий ваколатхонаси томонидан тарқатилди.

“2025 йил бизнинг йилимиз, Украина йили бўлсин, биз биламизки, бизга тинчлик берилмайди, лекин биз Россияни тўхтатиш ва урушни тугатиш учун ҳамма нарсани қиламиз”, деган Зеленский. 

Киев “Европа Украинаси” томон ҳаракатланишда давом этади

Украина раҳбари Киевнинг “Европа Украинаси” сари интилишда давом этишига умид билдирди. У 2024 йилнинг июнь ойида Украинанинг Европа Иттифоқига қўшилиши бўйича музокаралар бошланганини эслатди.

“Украина эса Европа Иттифоқида бўлади ва бир кун келиб Украина НАТОда бўлади ва иттифоқни мустаҳкамлайди. Мен, барчамиз, етарлича кучли бўлган Украина учун курашишимиз керак, чунки уруш майдонида ҳам, музокаралар столида ҳам шундай Украина ҳурмат қилинади ва эшитилади”, деди Зеленский. 

Президент ва унинг рафиқаси Елена Зеленская ҳам Теlegramʼда украиналикларни 2025 йил билан табриклади. Улар янги йил Украина ғалабаси сари яна бир қадам бўлишига умид билдирди.

“Менинг орқамда она Украина турибди. Оёғида мустаҳкам турган, бошини эгмаган, олдинга қараган, ўз келажагига ишонган ва Россия бизга олиб келган барча ёмонликлар устидан ғалаба қозонган Украина. Украина адолатли тинчликка эришишга қодир - қалқон ва қиличга эга. Халқини, рангларини, мустақиллигини ҳимоя қилиш учун. Бугун мен Украинани қадрлайдиган, ўз давлатини қадрлайдиган ва уни меҳр билан "Меники" деб атайдиган барчага мурожаат қиламан. 2024 йил учун раҳмат айтаман. Барча қийинчиликларга муносиб бардош берган халқмиз. Украина фуқароси бўлиш ғурур манбаидир. Мен учун эса қанотли халқни қанотли ракета ҳам мағлуб эта олмаслигини исботлайдиган ана шундай инсонлар – украиналикларнинг Президенти бўлиш ғурур беради. 2025 йил бизнинг йилимиз бўлсин. Украина йили. Биламизки, тинчлик бизга совға сифатида берилмайди. Аммо биз Россияни тўхтатиш ва урушни тугатиш учун ҳамма нарсани қиламиз. Бу ҳар биримиз орзу қилган нарсадир.

Ҳаммамизнинг орқамизда она Украина турибди. Ва у тинчликда яшашга лойиқдир. Барчамизга шуни тилайман. Украина Президенти сифатида, шунингдек, фуқаро сифатида мен келгуси йилда бунга эришиш учун ҳамма нарсани қиламан. Биламан, сиз мен билан – миллионлаб украиналиклар билан елкама-елка турасиз”, деган Украина Президенти.

Путиннинг янги йил нутқи

Россия Президенти Владимир Путин, ўз навбатида, Янги йил мурожаатининг асосий қисмини ҳарбий мавзуларга бағишлади. У яқинлашиб келаётган Иккинчи жаҳон урушидаги ғалабанинг 80 йиллигини эслаб, 2025 йил Россияда “Ватан ҳимоячилари йили” деб эълон қилинганини таъкидлади. 

Россия раҳбари ўз нутқида “суверенитет”, ”тарихий аҳамиятга эга” воқеалар, “Россия тақдири” ҳақида ҳам гапирди. 

Ўтган давр ҳақида гапирар экан, Путин, хусусан: “Биз катта мақсадлар қўйдик ва уларга эришдик”, “биз аллақачон қилинган ишлар билан ҳақли равишда фахрланишимиз мумкин”, деди. Бироқ у айнан қандай ютуқлар ҳақида гапираётганига аниқлик киритмади. 

Москва кетма-кет учинчи Янги йилни мушакбозликларсиз нишонлади. Қайд этилишича, шаҳар ҳокимияти Россия ва Украина ўртасида давом этаётган уруш фонида шундай қарорга келган.

Россиянинг ўнга яқин вилоятида пиротехника воситаларидан фойдаланишга чекловлар ёки тақиқлар жорий қилинган.