Путин ва Украина урушини танқид қилган блогер қамоққа олинди

Россиялик блогер Илья Ремесло Украинадаги уруш ва мамлакат Президенти Владимир Путинни танқид қилгани учун қўлга олинди. Бу ҳақда ТАСС хабар берди.

Ҳуқуқ-тартибот органларининг маълумотига кўра, Ремесло Россия Жиноят кодексининг 207.3-моддаси 2-қисми (Россия Қуролли кучларидан фойдаланиш ҳақида олдиндан ёлғонлиги маълум бўлган ахборотни сиёсий адоват сабабли оммавий тарқатиш) бўйича тергов қилинаётган иш доирасида ушланган. Агар у айбдор деб топилса, 10 йилгача озодликдан маҳрум қилиниши мумкин. Бу маълумотни унинг адвокати Сергей Бадашмин ҳам ТАСС’га тасдиқлаган.

Маълумот учун, санкт-петербурглик ҳуқуқшунос сифатида танилган Ремесло аввал Кремль тарафдори бўлган ва мухолифат етакчиси Алексей Навальнийни кескин танқид қилиб келган. Навальний коррупцияга қарши курашган ва 2024 йилда қамоқда вафот этган.

Бироқ Ремесло 2026 йил март ойида ўз позициясини тубдан ўзгартирган. У ижтимоий тармоқларда “Нега мен Владимир Путинни қўллаб-қувватлашни тўхтатдим: беш сабаб” номли манифестни эълон қилди. Ҳужжат интернетда кенг тарқалди.

Манифестда у Украинадаги урушни қоралаган, сўз эркинлигига қўйилган чекловларни танқид қилган ҳамда Путинни лавозимидан кетишга ва суд олдида жавоб беришга чақирган. Манифест чоп этилганидан бир неча кун ўтиб, Ремесло Санкт-Петербургдаги руҳий касалликлар шифохонасига жойлаштирилган. Унинг шифохонага ихтиёрий ёки мажбурий тарзда ётқизилгани ҳақида аниқ маълумот йўқ.

Блогер тахминан бир ойдан кейин шифохонадан чиқарилган. Энди эса у Россия армияси ҳақида “фейк маълумот” тарқатганлик бўйича жиноий иш доирасида қўлга олинган.

Эслатиб ўтамиз, аввалроқ Путин ва Лукашенконинг карикатурасини чизган россиялик рассом Польшада отиб ўлдирилган эди.