Путин Россиядан Ўзбекистонга 1 млн рублдан ортиқ нақд пул олиб чиқишни тақиқлади

Россиядан Ўзбекистон, Арманистон, Беларусь, Қозоғистон, Қирғизистон, Озарбайжон ва Тожикистонга 1 миллион рублдан ортиқ нақд пулни олиб чиқиш тақиқланди. Бу ҳақда бугун, 29 сентябрь куни Россия Президенти Владимир Путин “Россия Федерациясидан нақд Россия Федерацияси валютаси ва қуйма кўринишидаги олтинни олиб чиқишнинг алоҳида тартиби тўғрисида”ги фармонни имзолади.

Ҳужжатда айтилишича, юридик шахслар ва якка тартибдаги тадбиркорларга суммасидан қатъи назар ушбу мамлакатларга нақд пул олиб чиқиш принципиал жиҳатдан ман этилади. Фармонда истисно ҳолатлар ҳам кўзда тутилган.

Хусусан, чекловлар юридик шахслар томонидан нақд пулнинг транзит ташилишига ҳамда Россиянинг хориждаги дипломатик ваколатхоналари фаолиятини таъминлаш учун рубль олиб чиқилишига татбиқ этилмайди.

Бошқа ҳолатларда нақд пулни ҳукумат томонидан рўйхати белгиланадиган муайян аэропортлар орқали олиб чиқиш мумкин бўлади. Бунда ёнида пул уни олиб ўтаётган шахснинг ҳисобварақларидан ечиб олингани тўғрисида банк кўчирмаси бўлиши талаб этилади.

Тақиқ бузилган тақдирда пуллар мусодара қилинади: юридик шахслар ва якка тартибдаги тадбиркорлардан тўлиқ ҳажмда, жисмоний шахслардан эса рухсат этилган 1 миллион рубль лимитидан ортиқча қисми олиб қўйилади.

Маълумот учун, Янги фармон Путин томонидан 2026 йилнинг апрель ойида жорий этилган нақд пул ва алтин олиб чиқиш бўйича чекловларни янада кучайтиради. Ўшанда Евроосиё иқтисодий иттифоқи (ЕОИИ) мамлакатларига 100 минг доллар эквивалентидан ортиқ бўлган нақд рубль, шунингдек, умумий вазни 100 граммдан ортиқ бўлган қуйма кўринишидаги аффинаж қилинган олтинни олиб чиқиш тақиқланган эди. 2026 йилнинг сентябрь ойида Россия Марказий банки “бу йўналишда янада кўпроқ тартиб кераклигини” билдириб, қоидаларни такомиллаштиришга чақирган.