Путин уч йил деганда Минскка келяпти. У Лукашенконинг танобини тортиб қайтадими?

Россия Президенти Владимир Путин бугун, 19 декабрь куни бир кунлик иш сафари билан Минскка боради ва у ерда Александр Лукашенко билан музокаралар ўтказади. 

Икки давлат раҳбарлари доимий равишда, жумладан, шахсан ва телефон орқали мулоқотда бўлиб турибди. Сўнгги уч йил ичида уларнинг барча кенг кўламли икки томонлама музокаралари Россияда бўлиб ўтди. Президентлар бошқа мамлакатлардаги саммитлар ўтказиладиган жойларда ҳам мулоқот қилдилар. 

Путин 2019 йил июнидан бери илк бор Беларусга ташриф буюради. Россия давлати раҳбари аввалги ташрифи чоғида II Европа ўйинлари доирасидаги бокс ва гимнастика мусобақаларида бўлиб, Халқаро олимпия қўмитаси президенти Томас Бах билан учрашди, спортчилар билан суҳбатлашди. 

Учрашув кун тартиби

Кремль матбуот хизмати таъкидлаганидек, кун тартиби Россия-Беларусь стратегик шериклик ва иттифоқчилик муносабатларини янада ривожлантиришнинг асосий масалаларини, шунингдек, Иттифоқ доирасидаги интеграцион ҳамкорликка эътибор қаратиш, халқаро ва Минскдаги музокараларда минтақавий кун тартибини муҳокама қилишдан иборат

Россия етакчисининг матбуот котиби Дмитрий Песковнинг айтишича, суҳбатда “икки томонлама муносабатларнинг бутун палитраси”, жумладан, савдо-иқтисодий ҳамкорлик ҳақида гап боради. Минскдан олинган маълумотларга кўра, мавзулар орасида иттифоқ дастурларини амалга ошириш ва импорт ўрнини босишга урғу берилган қўшма ҳамкорлик лойиҳалари киради. Шунингдек, кун тартибида энергетика соҳасидаги ҳамкорлик ҳам бор. 

Беларусь резиденти бир неча кун олдин Беларусь-Россия ҳамкорлиги масалалари бўйича йиғилиш ўтказди. Унда Лукашенко россиялик ҳамкасби билан музокараларда асосий масала иқтисодий масалалар бўлишини таъкидлади. Унинг сўзларига кўра, муҳокамада икки давлат атрофидаги ҳарбий-сиёсий вазият, ҳарбий-саноат комплекси, хавфсизлик, мудофаа қобилияти масалалари ҳам муҳокама қилинади. 

Лукашенко музокаралар чоғида газ нархи мавзусини ҳам кўтаришни режалаштирган. Унинг фикрича, бундай чуқур ҳамкорликда корхоналарга тенг шароитларни яратиш муҳим. 

Минск эълон қилганидек, учрашув дастури бой бўлади. Музокаралар кенг форматдаги суҳбатдан бошланади. Унда давлат раҳбарлари, шунингдек, икки мамлакат ҳукуматлари аъзолари, вазирлик ва идоралар раҳбарлари иштирок этади. Ушбу форматда томонлар Беларусь-Россия интеграциясининг энг долзарб муаммоларининг бутун мажмуасини батафсил муҳокама қилади.

Шундан сўнг Путин ва Лукашенко яккама-якка музокараларини давом эттиради, қолаверса, улар баёнот ва журналистлар саволларига жавоб бериши кутилмоқда. 

Беларусь томонининг хабар беришича, етакчиларнинг тор доирадаги учрашувида мудофаа вазирлари иштирок этади. Икки ҳафта аввал Минскка Россия Мудофаа вазири Сергей Шойгу ҳам ташриф буюрган эди. Кейин у беларуслик ҳамкасби Виктор Хренин билан учрашди ва у билан ҳарбий соҳада минтақавий хавфсизликни биргаликда таъминлаш бўйича давлатлараро битимга ўзгартиришлар киритиш тўғрисидаги протоколни имзолади. Шойгу Лукашенко билан ҳам гаплашган.

Эслатиб ўтамиз, Америка урушни ўрганиш институти таҳлилчиларининг фикрича, Путин Минскка бўлажак ташрифи чоғида Беларусь ҳукмдори Александр Лукашенкога икки давлат интеграцияси бўйича имтиёзларга эришиш учун босим ўтказиш ниятида.