Путин туғилган кунида қандай совғалар олди?

Жорий йил 7 октябрь куни 73 ёшни қаршилаган Россия Президенти Владимир Путин туғилган кунида ҳарбийлар ҳамроҳлигида Пётр I дан бошлаб рус императорлари дафн этилган Петропавл соборига борди. Ўша куни Путин ҳарбийлар билан кенгаш ўтказди. Кейин улар билан тушлик қилди. Туғилган кунда Путинга совғалар ҳам берилди. Россия етакчиси қандай совғалар олганини бугун, 10 октябрь куни Душанбеда ўтказган матбуот анжуманида маълум қилди.

“Турли ҳарбий мавзулардагы фигуралар, китоблар. Лекин, эҳтимол, иккита совға жуда алоҳида аҳамиятга эга. Қўмондонлардан бири менга иккита икона топширди – улар бизнинг жангчиларда бўлган ва айнан ўша иконалар уларни ўлимдан асраган. Уларда пуля излари бор. Шу иконаларни менга совға қилишди. Мен улардан жуда миннатдорман, албатта, уларни топаман, гаплашаман”, деди Путин.

Ўтган йили 7 октябрь – Путиннинг туғилган кунида Москвада МДҲга аъзо давлатлар раҳбарлари учун норасмий кечки овқат ташкил этилганди. Унда қатнашган Президентларга палов тортилган. 2023 йилда эса Путин туғилган кунини Ўзбекистон Президенти Шавкат Мирзиёев ва Қозоғистон Президенти Қосим-Жомарт Тўқаев билан нишонлаган.